ribaraw; an siisay man na makakita kan mga iyán masabi na sa atubang kan saindang mga mata dai nagsasaga an anó man na pagsárig, dai nin mamongáyang omaaboton. Minsan sa lambang agwat nakakapagaya-gaya kan lakaw su mga mabansay na nota asin maya- yaman sa kúray kan mga nagaarádal na mga babaye sa abaga su cintas asin sa kamot su mga libro, pinangagsusunod nin mga sorogoón na mga babaye, alágad pahangá na dumaging an saró na ngisi, pahangang mamaté an sarong soba; daing anó pa man na áwit, dai nin mga mababansay na mga pasarahotan; kun baga man mga magabat na soba, iriwal nin mga saradit na akí. Haros pormal su mga dakúlá na asin mga marhay su panggubingan síring kan mga estudianteng alemán.
Sinósog ni Plácido su paseo de Magallanes ta málaog sa wangwang kaito tatá kan Santo Domingo, kan panalé sana syang taptapon sa abaga nakapabirik saiyang baldí.
"Tara, Penitente, tara, Penitente!" Iyo su kaklase nya na si Juanito Pelaéz, su manggugunting (185) o favorito kan mga profesores, tarandukan asin daing síring karáot, sa sarawayon an mga hilingon asin sa tampalasan an mga hoyom. Aki nin sarong kastilá, mayaman na comerciante sa saró kan mga póok sa luwas kan banwaan na an pagsárig pinapasíkad sa kadonongan kan hagbayon, kaniguan an mapapaghalat saiya huli kan saiyang mga gaweng sa tarandukan asin, salámat sa saíyang ugalé nin madápang panugal sa kagabsan, dangan minapaiplí sa saíyang pagiriba, may saró syang napapalaen na karaw na mináorog kun nakakatamá sya asin minangisi pa. "Paano kang magkaigwang kaalingan, Penitente?" an hapot kan tominaptap saiya nin kosog sa abaga. "Siring kaini, síring kaini, palingpaling nin kadikit, asin ika?" "Sa diosnon na gayo! Honahonaon mo na inanyayahan ako kan cura sa Tiani na magpalibanglíbang (186) sa saíyang banwaan, máduman ako, chico! Midbid mo si Padre Camorra? Saró syang masamwang na cura, campechano, tapat, tapat na marhay, an saiyang mga garaweón siring kan ki Padre Paco... Asin huli ta may mga magagayon na mga daragitay, nanghaharana kami, sya su saiyang guitarra asin su saiyang mga petenera asin ako man su sakong violin... Sabihan taka, chico,
