sa burro, ginang, su sa burro!”
“Alagad, aki,” an simbag kan ginang, “pagisipisipon mo an dakilang halaga na nasasayang sa mga suelas. Igwa nin ikakapension sa dakol na mga ilo asin mga balo tanganing maingatan an marhay na dangog. Asin hare ka pagngisi, dai ako nagsasabi dapit sakuya igwa akong pension minsan kadikit, kadikit na marhay sa mga paglingkod na idinolot kan sakong agom, kundi nagtataram ako dapit sa iba na nagdadara nin makauugay na pagkabuhay: bakong matanos na pakatapus nin makuring pagpipirit sa pagpadigdi asin pakatapus na makaibong sa kadagatan, sumampot digdi sa pagkagadan sa punaw... Cierto gayod an sinasabi mo dapit sa mga soldados, alagad an pangyari iyo na labi na akong tolong taon sa Kaporoan asin dai pa ako nakahiling nin sarong nagpipilaypilay.”
“Sa bagay na iyan minasa-ganan akong siring kan ginang,” an sabi kan saiyang kataid, “sa ano dapit an pagtao sainda nin mga zapatos kun nagkamorondag na dai kan mga iyan?”’
“Asin ano ta mga bado?
“Asin ano ta mga pantalon?”’
“Hona-honaon mo an papakinabangan nyato sa sarong hokbong huruba!” an panapus na tataramon kan sorog sa mga soldados.
Sa saro naman na pangkat lalong mainit su pasuruhay. Si Ben Zayb nagtataram asin nagtatalumpati, si Padre Camorra sa giraray mandiit-mandiit sinasaligbaton sya. Su tagapamahayag-na-fraile, minsan kaniguan an paggalang nya sa mga fraile, sa giraray nakikipagsuhay ki Padre Camorra na ibinibilang nyang porofraile na masipag na gayo; asin sa bagay na ini nagsasagin talingkas asin pinapapurawas an mga sombong kan mga nagaarapod saiyang nin Fray Ibanez. Namumuyahan ni Padre Camorra an saiyang kalaban; iyo lamang an minasaboot na gayo kan pinagaapod nyang saiyang mga pangatanosan.
Magnetismo an pinaghohororonan, espiritismo, magia, asin iba pa, asin nagraralayog sa angkas su mga tataramon siring kan mga cuchillo asin mga bola kan mga parakawat nin bola: inaarapon ninda an mga ito asin sinasaralo ninda.
Kan taon na ito nakakaapod na marhay kan panga-
