Sa bilog na lakaw na ito nagdanay na daing kaalo si Simoun na baga nalologom sa orog kamahalagang paghorophorop. Si Placido, sa paghalat na pakihoronan sya, dai minataram ininsan sarong tataramon asin naglilingalinga sa paghiling sa dakol na mga nagraralakawlakaw na mga nangagbahigay kan saga kan tala-sinag. Mga bagong-tawo, mga pasangan (267) nin mga magkatipan, mga nagmamahal, na pinagsosoronod nin mga maingat na ina o nin mga inaon; pangkat nin mga estudiante na mga puti ang gubing na orog pang pinapapuruti kan tala-sinag; mga soldados na paralingpaling, sa mga lunadan na anom sa sarong lunad, pasiring sa templong nipa na ipinanongod ki Citeros; mga aki na nagkakarawat nin turubigan, mga intsik na mga parabalidya nin tubo asin iba pa, nagpapakapano sa dalan asin sa masagang liwanag kan tala-sinag nagkakamit sinda nin magagayon na porma asin tiyatang (268) palibot. Sa sarong harong nagtotogtog su orquesta nin mga valses asin nakikita an nagkapirang pasangan na nagsasarayaw sa liwanag kan mga quinque asin mga lampara... !abaa na kameskinong hilingon sa saiyang paghona kun ibabagay sa namamantaag sa mga lansangan! Asin sa pagisip dapit sa Hong Kong naghapot sa saiya mansana kun an mga banggi sa porong ito mga maipangrawitdawit (269) na gayo, mahahamis na gayong malipungaw siring kan mga sa Filipinas asin dinakop nin sarong tulahok na kamondoan su saiyang puso.
Pinaontok ni Simoun su lunadan asin magkasi sinda luminogsot. Kan hidaleng ito lominabay sa may sainda si Isagani asin si Paulita Gomez na nagpapasinabihan sa hababang tingog nin mga mahamis na mga tatara mon: sa huri nagsusunod si Doña Victorina kaiba si Juanito na nagtataram sa halangkaw na tingog kaniguan su kahihiro asin lalong minaluwas na kobakob. Si Pelaez nayiyingying dai nahiling su saiyang kaito kaiba sa pagadal.
“!Iyan an talagang mamongaya!” an sabi ni Placido sa hababang tingog asin naghahagayhay asin tominanaw sa pangkat na binabaliw sa malopoop na mga ladawan saen nababarang na marhay su mga takyag ni Juanito na minaitaas asin minaibaba baga mga labadlabad nin molino.
“!Diyan lamang sya pinapakinabangan!” sabi man ni
