satuya an mga tawohan ni Cabesang Tales, su mga carabinero kaito asin sarong regimiento. Ngapit na ogaring, sakale gadan na si Maria Clara! Humale ka tolos mansana!”
Nawara su tawo.
Nasaksihan ni Placido an halipot na ining olay-olayan asin nadangog nya gabos; kan sa pagloba nya igwa syang nasabotan nagpanorongkag su buhok asin hiniling si Simoun nin natatakot na mga mata. Naghohoyomhoyom si Simoun.
“Nagtaka ika,” an sabi na kaiba su saiyang malipot na hoyom, “na an indio na ini na daing datang gayo an panggubingan makapagtaram nin marhay kan kastila? Sard sya kaitong tagapagtokdo sa mga paadalan na nagpumirit na itokdo an kastila sa mga aki asin dai ominontok sagkod na nawara nya su saiyang puesto asin deneportar sya bilang paralaglag kan kahusayan kan banwaan asin huli ta katood kaito kan daing palad na si Ibarra. Kinoa ko sa deportation saen ipinanongod su saiyang sadiri pagataman nin niyog asin ginibo ko syang pirotecnico.”
Bominalik sinda sa calzada asin napasiring sinda sa Trozo. Sa tangod nin sadit na harong na tabla, na magayagaya asin malinig su kamugtakan, may nagtutukaw na sarong kastila na nakaalindoon sa sarong muleta, nagpapahayahay sa liwanag kan tala-sinag. Dinolok ito ni Simoun; kan mahiling sya kan kastila naghinguhang tomindog pakapoota bilang an sarong inagmarod.
“Humanda ka!” an sabi saiya ni Simoun.
“Sa giraray iyo ako!”
“Sa maabot na semana!”
“Iyo?”
“Sa enot na potok nin cañon!”
Asin hominale sunod ni Placido na nagpopoon nang maghapot sa saiya mansana kun baga dai sya nangangatorogan.
“Nagtaka ika,” an hapot saiya ni Simoun, “na makakita nin kastila na orog na gayo kahagbayon asin pinasasakitan na padagos kan mga kahelangan? Igwa nang duwang taon na nakaagi na matabaon syang marhay na siring saimo, alagad nahimo kan saiyang mga kaiwal na ikapadara sya sa Balabak tanganing maglingkod sa sa rong mahigpit na compania asin hilinga ta igwa na
