hon ako sa saimong mga, bubuhayon ako liwat asin an tala-sinag na iyan, bago makaabot sa katapusan kan saiyang banggraw; paliliwanagan an Filipinas, malinig na kan saiyang makasosomong mga ati!”
Panale sanang ominontok nin pagtaram si Simoun na baga natitiok. Sarong tingog naghahapot sa laog kan saiyang conciencia, kun baga sya, si Simoun bako man na kabtang kan mga basura kan isinumpang lungsod, sakale an tanay na orog na gayo kaosbog. Asin siring kan mga gadan na magkakaburuhay liwat sa daging kan trompetang makagigiram, sangribong fantasma na mga maki dugo, mga daing pagsarig na mga anino nin mga lalaking rinilibon, mga babayeng mga hinalean nin dangog, mga amang pinagborolnot sa saindang angkos, mga pinatubang asin pinadakula na mga maraot na kaugalean, mga kabanalan na pinaglanghadan, mga kabanalan na pinagbasangbasang, minatirindog ngunyan sa aniningal kan misteriosong hapot. Kaenotenote pa lamang sa saiyang criminal na lakaw magpoon kan sa Habana, sa pamamatahaw kan vicio asin kan sohol, boot lumalang nin sarong kasangkapan sa paggibo kan sa iyang mga mokna, sarong tawong daing pagtubod, daing mahal sa banwaan asin daing conciencia, iyo pa lamang sa buhay na ito nanuhay asin minasolang sa saiyang mga gawe. Piniyong ni Simoun su saiyang mga mata asin nataodtaod na daing hiro-hiro; dangan hinapros kan kamot su angog, bilang hominabong homiling sa saiyang conciencia asin nagkaigwa nin katakutan. Dai, dai boot na magatidatid kan saiyang buhay, dai sya nin karigonan na isalingoy an saiyang paghiling sa ominagi na... Madaihan sya nin dasig sa pagdangadang nanggad kan hidaleng stikat syang gumawe, magkulang sya nin yakang (273), nin tiwala sa saiya mansana! Nin huli ta su ladawan kan mga makauugay na an kapaladan kan mga ito saiyang nalasigan, nagpapadagos nin paglatawlataw sa atubang kan saiyang mga mata na baga naghahale sa makintab na ibabaw kan salog asin sinasalakay su lalamban asin pinagkukurahawan sya asin ipiggagawgaw saiya su mga kamot; huli ta su mga panghimasol asin su mga pagdadalita garong nagpapakapano sa angkas na nadadangog an mga pagbabanta asin mga tingog nin panghimalos, ihinarayo su saiyang paghiling sa dungawan asin sakale iyo pa sana ito nagpoon nin pangibigkibig.
