gad orog pa kagayon an tindog asin kun papaniwalaan an mga huringhuding, su saiyang pagkamaninigo nin pagmahal nangingibabaw sa tingog asin sa tindog. Sa ika-pito may kabangang horas nin banggi dai na nin mga ticket minsan sa ki Padre Salvi, asin halabaon na rayray su mga sa entrada general. May kariribukan sa taquilla, iriwal, naonabihan an filibusterismo asin mga lahi, alagad bakong huli kaiyan nagpapakakoa nin mga ticket. Kaglimang minuto bago mag-ikawalong horas sarong asiento de anfiteatro ipinagtatandro sa halagang halangkawon na marhay. Sa kamugtakan kan gadung na naliliwanagan na bulanos, may mga tinanom asin mga burak sa gabos na mga tata nakalibong sa mga nalalawat, na nagrorokyaw asin nagooropak. Sarong mahibog na bilang nin katawohan nangonokono sa palibot mga maorihon na naghihiriling sa mga nagraralaog, sa mga minaabot na atab mga handal na magkadaraihan nin tukawan; mga olok mga ngorobngorob, mga paghahalat nagpapataratara sa mga bagong datong, na sa makuring kamondoan minasararo sa mga osyoso asin, mantang dai nagpakalaog, igo na lamang saindang maghiling sa mga nagraralaog.
Alagad igwa nin saro na garong dai sanang pagmangno sa siring na pagmawot, sa siring na kaosyosohan. Sarong lalaki na halangkaw, maniwang, na luhayluhay maglakaw, naggogoyod nin sarong toog na bitis. Naggugubing nin sarong daanon nang americana na kuray kape asin sarong pantalon na may mga tagabang, maati, na minapalataw kan saiyang mga kabtang na mga tul-angan asin mga maniniwang. Sarong kalo na hongo, masining (312) huli ta parasing, nakakatahob kan saiyang dakulang payo may nagooroldot na mga buhok na maating abohon su kuray, haros bulaw, nanaringsing sa saiyang mga gilid na baga alapok nin sarong tagapagawit. An orog kahayag sa tawong ito bakong su saiyang gubing, bako su saiyang sa europeong panglawog na daing barabas asin bigote, kundi an makosog na pulang kuray kaito, kuray na nakatao saiya kan bansag na Lotongboyod (313) namimidbid sya sa irarom kaini. Sard syang pangbihirang tipo: kabilang sa sarong lataw na angkos, nabubuhay siring sa sarong lagawlaw, sarong makilimos; nasa kastilang lahi, pinagtutuya-tuya nya su marhay na dangog na hinahagupas nya kan saiyang maating panggubingan; nabibilang
