makita su duwang hagbayon.
“!Bantay, Don Basilio,” an sabi na nagpataratara sa mapagampon na tingog, “magbabakasyon ka? Kahimanwa mo an ginoo?”
Ipinamidbid ni Basilio si Isagani asin nagsabi na bako sindang magkahimanwa, alagad bakong harayong marhay an saindang banwaan. Si Isagani nageerok sa pangpang nin kadagatan sa contra costa.
Inogid ni Simoun sa dakulang pangataman si Isagani, na sa kabaldian kaini bominirik asin pinotitokan sya dara an sarong mapagagyat na talad.
“Asin komosta an lalawigan?” an hapot ni Simoun na inatubang si Basilio. “Komosta, dai mo midbid?”
“Paano kong mamidbiran na dai pa sagkod ako nakabatay duman? Sinabihan ako na dukhang marhay asin dai nagbabakal nin alajas.”
“Dai kami nagbabakal nin alajas ta dai mi kaipuhan,” an laghod na simbag ni Isagani, na nasaktan sa saiyang sa taga-lalawigan na kaabhawan.
Sarong hoyom lominadawan sa malungsing ngabil ni Simoun.
“Dai mo ipagraot sa boot, hagbayon,” an simbag, “dai lamang ako nin maraot na kaisipan, nin huli ta pinatotohanan na gayo sakuya na haros gabos na parroquia na sa kamot nin mga clerigong indio, nagsabi ako sa sako mansana: an mga fraile kaniguan na an pagmawot na magkaigwa nin parroquia asin an mga franciscano nasisinangan sa mga orog kadukha (52), mala ta kun magkasi magpahoronod sa mga clerigo, iyan tanda na duman dai namimidbid an ladawan kan hade !Ahay, mga ginoo, madya kamo magirinom kita nin cerveza asin mag-alap (53) kita sa kauswagan kan saindong lalawigan!”
Nagpasalamat su mga hagbayon asin nagsarahotan na dai sinda nagiinom nin cerveza.
“Sala an saindong gibo,” an simbag ni Simoun na hayag na gayong dai naoyonan; “an cerveza sarong marahay na bagay, asin ngunyan na aga nadangog ko si Padre Camorra na an nakikitang kakulangan nin karigonan sa bansang ini minagikan sa kadakolan nin tubig na iniinom kan mga nageerok digdi.”
Si Isagani na haros katopong kan joyero, tominindog nin tanos!
