kan hararom na kadagatan, may mga limang polong metro sa sakong mga bitis, naghahanap nin mga halimaw sa kakadlaganan nin mga madrepora asin mga coral na mga nagkakataran-aw sa bughaw na kadagatan, su mga darakulang halas na, siring sa sabi kan mga taga-oma, minaharalé sa kadlagan tanganing sa dagat magérok asin magkamit nin makanginirhat na pagkabilog. Sa mga pagkahapon na, sabi, iyo an pagluwas kan mga mangindara, pinaghihinirip ko an mga ito sa lambang alon, sa dakulang gayong pagmawot na sarong baldit sa paghona ko namansayan ko an mga ini sa tahaw kan mga sabo, na nagkakarawat kan saindang mga diosnon na kawat; malinaw na malinaw su pagkadangog ko kan saindang mga awit, mga awit nin katalingkasan, asin namaté ko su daging kan saindang gapirak na mga arpa. Kaito pinapaag? ko an halawig na mga horas sa kahihiling na binabaliw an nga panganoron, pinagmamasdan ko an iyoiyong kahoy sa tanayad, sarong bato, na dai ko ikinapapaliwanag sa sakong sadiri an dahelan kun ano, dai ko ikinasasaysay an bakong gayong sayod na kamatean na pinopukaw kan mga ito sa sakong sadiri. Parati akong pagsermonan kan sakong amaon nin haralawig na mga sermon asin sa takot na magi akong hipocondriaco nagsasabi na dadarahon ako sa harong nin sarong médico. Alagad nakita ko ika, namotan taka, asin sa mga vacacion na ini, sa paghona ko duman may nagkukulang sakuya, su kadlagan madiklom, mamondo su salog na nagbobolos sa kahiwasan, malipungaw su dagat, daing ano man na linalang sa harayo... Ah! kun nagduman ka lamang minsan makasaro sana, kun nakabatay lamang an saimong mga bitis sa mga dalan na ito, kun pinagbubukag mo kan punta kan saimong mga moro an tubig kan sapa, kun hinihiling mo an dagat, kun minatukaw ka sa gapo asin pinapasawisiw (354) mo an angkas kan malumbay mong mga awit, an sakong kadlagan magiging Paraiso, mangagaawit an mga alon kan sapa, maluwas an liwanag sa mga madiklom na mga dahon, magiging mga brillante an mga toro kan ambon asin sa mga perlas an mga sabo kan dagat!”’
Alagad nadangog ni Paulita an sabi na pagpaduman sa banwaan ni Isagani kaipuhan na omagi sa kaboldan na kadakol na mga limatok, asin sa pagisip sana kan bagay na ini, nangingibigkibig su matalaw. Muya sa
