nao mapadapit sa pagtokdo nin kastila. Tinaragoram ninda su gabos na mga latok, pinadugangan su mga ilaw asin ipinadokot sa lanob an pambirang ining oroawit:
- “!KAOMAWAN KI CUSTODIO HULI SA
- SAIYANG KAGALINGAN
- ASIN SA IBABAW NIN DAGA PANSIT SA
- MGA KAINSIKAN
- NIN MGA BOOT NA MABANSAY!”
- “!KAOMAWAN KI CUSTODIO HULI SA
Sa sarong bansa saen an gabos na mga kadustaan tinatahoban nin aliboy nin kaigotan, saen kadakol an minaitaas sa kosog nin aso asin sa mainit na angkas; sa sarong bansa saen an poral na gayo asin tapat na bulanos nakakaratak an pagluwas sa puso mangyaring gikanan nin mga karibukan, alongating gayo na iyo ito an orog karahay na paagi sa pagrokyaw kan naisipan ni Don Custodio. Su mga nagkaparalaog nangagsisimbag sa kaologologan nin sarong harakhak, sa pastel kan pamahalaan nagbaralos nin sarong platong pansit, asin labi pa!
Nagngingirisi, nagsosoroba, alagad hiling na gayo na sa kaogmahan igwa nin pagpipirit; su mga ngisi naghahagong sa kinokurab na pangingibigkibig, sa mga may minaluwas na mga pananaleng silyab asin sa labing saro nakita nagsilaksigak an sarong luha. Alagad minsan siring an mga bagong-tawong ito mga mabangis, bakong mga matanos! Bako ito an enot na hinohusay sa siring na palakaw an orog kabansay na mga kaisipan, na sinasayang an mga pananarig nin dakol na mga tataramon asin saradit na mga gawe: bago ki Don Custodio, kadakol pang iba, dakolon na gayo!
Sa tahaw kan bidang asin sa tangod nin mga farol na pula, nakikita an apat na mataralidong na mga latok, baragay su pagkapamugtak na minabilog nin lapangtana (368); nagagaramit na mga tukawan mga bankitong kahoy na mga matalidong man. Sa tahaw nin lambang latok, sunod sa kinaugalean kan kaonan, nalalantad an apat na platito na mga kurayan na may apat na pastel lambang saro, asin apat na tasang tsa lambang saro may takop, gabos anas na porcelanang pula; sa lambang bankito nakikita an sarong botella asin duwang copa nin bobog na masiga.
Si Sandoval, bilang sarong boot makaaram, naghihilinghiling, nagoogid kan gabos, pinagmamasdan su
