matanos.
“ !Abaang rahay kan ginibo ko kan sako syang pahaleon sa sakong harong!” an sabi ni Hermanang Penchang; “habo akong makipagkamondoan sa mga fraile; kaya sinibot ko syang humanap nin kuwarta.”
An katotoohan iyo na ipinagkolog nya sa boot na libre na si Juli ipinangangadye asin ipinagaayuno sya ni Juli asin kun naghaloy pa duman nagpenitencia man kuta. Ngata? kun ipinamimibi kita kan mga cura asin si Cristo nagadan huli sa satong mga sala, dai daw gumibo nin siring si Juli ki Hermánang Penchang?
Kan makaabot su bareta sa kamálig na pinageerokan ni Juli asin kan saiyang apo, nangaipo su daraga na oliton saiya nin makaduwa. Hiniling si Hermanang Bali na iyong nagsabi kaito saiya, na baga dai nya nasabotan, dai nya napag-aratidatid su saiyang mga nasaisip; nagbolongbogong su saiyang talinga, namate nyang pominiot su saiyang daghan asin nagkaigwa nin bakong mahusay na galinaw na an pangyaring ito makapupungaw na makalalasig sa saiyang omaaboton. Minsan siring, boot na kumopo sa sarong sirang nin pagsarig, hominoyom, sa paghona dinadarahan ni Herma nang Bali nin soba, na magabat na gayo, alagad ipinapangenot na nya an kapatawadan saiya; alagad si Hermanang Bali gominibo nin cruz kan toldo asin kan tangan dangan hinadokan, tanda na nagsasabi kan katotoohan. Dangan kaiyan su ngoso kan daraga binayaan sagkod noarin pa man kan daraga, lominungsi, makangingirhat na pagkalungsi, nakamateng binabayaan sya kan mga kosog asin, iyo pa sana bilog nyang pagkabuhay, nawar-an nin pagkatawo, nalonosan.
Kan huli sa mga pagkokolog, mga kodot, mga pagwirik nin tubig, mga cruz asin pagbugtak nin mga langkoy na benditado naulian su daraga asin nakamangno kan saiyang kamugtakan, mahimong na nagbolos sa saiyang mga mata su mga luha, saro-sarong tagdo, daing mga siniloksigok, daing mga kamondoan, daing mga hinanakit! Pinagiisip nya si Basilio na dai nin ibang paraampon kundi si Capitan Tiago asin, gadan ini, dai na nanggad nin pagampon asin pakahiwas. Sa Filipinas natatalastas na gayo na sa gabos kakulangan an padrino, magpoon na binobonyagan an saro sagkod na nagagadan, sa pagkamit nin sandagan, magkoa nin pasaporte okun magexplotar nin ano man na industria.
