yari kan hapon na ito.
Sarong daraga lominampaw sa bintaná kan convento, huminugpá sa kagapoán asin nagadán. Haros kan oras mansanang ito, saró man na babaye nagluwas sa tatá asin naglíbot sa mga lansangan nagkukuráhaw síring sa sarong rongaw. Su mga maálam na mga magnaratad dai nangarahas na maghilwas kan mga pagngaran asin dakol na mga iná an nagkorodot sa saindang mga áking babaye huli ta nagpakahilwas nin mga katagang makapagaboy sainda. Pakatapus, haloy nang marhay pakatapus, sarong gurang na halè sa sarong barrio asin nagparaápod sa tatá kan convento na pintó asin nababantayán nin mga sacristán. lyong ipinagaapod kan gurang su saiyang kamaoo, kaiba su payo, nagtutupga nin nalalamos na mga kinuráhaw, dai saráyod síring kan sa sarong pula, sagkod na inalaw sya sa pákol asin ipinagtotonyod. Dangan napasíring sa harong kan gobernadorcillo, alagád sinabihan sya na dai su gobernadorcillo, nasa convento; napaduman sa Pangkatiwasayan na Hokom, alagad su Pangkatiwasayan na Hokom dai man,itoon sa convento; napasiring sa cuartel; su Teniente sa Guardia Civil nasa convento. Su gurang nagpuli sa sa iyang barrio naghihibing garong akí: su saiyang mga inóngal nadadangog sa tahaw nin kabanggihon; kinakagat kan mga lalaki su saindang ngabil pinagtatagbó kan mga babaye su saindang kamot, asin su mga áyam nasa saindang harong, tarakot, garahag su ikog!
“!Ah, Dios, ah, Dios!” an sabi nin sarong dukhang babaye, maniwang huli sa kaaayuno: “sa saímong atubang daing mayaman, daing dukhá, daing putí, daing itom ... gigibohan mo kami nin sandagan!”
“Ohó,” an simbag kan agom na lalaki; “bastang an Dios na ining ipinagbabalangíbog bakong togdas lámang, sarong gayuma! Sinda an mga énot na dai minátubod saiya!”
Sa ikawalong horas nin banggi, pigsarabi na labing pitong fraile, mga haralé sa kataráning na banwaan,iritoon sa convento naghuhurunta. Kan sominonod na aldaw, si Gurang Selo naghalè sa barrio sagkod lamang dara su saiyang sa paraayam na garod.
