297
tagumpay ako kaiba an mga paslong kapakan-an nin sarong bansa minsan pa an bansang iyan apodon asin inaapod na España!. . .” “Aram mo kun noarin mahale su correo?” an malipot na hapot kan Saiyang Kahalangkawan pakatapus nin pagtaram kan halangkaw na empleado. Hiniling sya nin potitok kan halangkaw na empleado, dangan dominoko asin daing girong na binayaan su palacio. Inabotan nya sa tatamnan su saiyang coche na naghahalat saiya. “Kun ngapit sarong aldaw magpahayag kamo na kamo mga talingkas na,” an sabi na baga namomongnan sa sarong lacayo (398) na nagbukas saiya kan pinto kan lunadan, “giromdoma nindo na sa España dai nagkulang nin mga puso na nangagkurutad huli saindo asin nakipagbaraka dahel sa saindong mga katanosan!” “Saen po?” an simbag kan lacayo na dai nakasabot saiya asin naghahapot kun baga saen sinda maduman. Pakalihis nin duwang horas, idinata kan halangkaw na empleado su saiyang pagbutas sa katongdan asin saiyang ipinaisi na mabalik sya sa España sa masunod na correo.
XXXII MGA BUNGA KAN MGA PASKIN Huli kan mga ibinareta nang mga pangyayari, inarapod nin dakol na mga ina su saindang mga aki tanganing tolos mansana talikdan ninda an saindang pagadal asin ipanongod ninda an saindang sadiri sa kahogakan o sa pagtanom. Kan omabot su examen, kaniguan su nagkahorolog bihira su nadara sa examen, huli ta nakabilang sa bantog na kaboronyogan na dai nin nagbalik na magokupar. Si Pecson, si Tadeo asin si Juanito Pelaez nagka horolog man; an enot nagkamit nin mga calabaza kan saiyang ngising sa lolong asin nanugang malaog syang oficial minsan sa arin na hokoman; si Tadeo huli kan daing katapusan na vacacion, nagbayad nin sarong panerangan (399) a paggibo nin sarong gambahan kan saiyang mga libro; su iba siring man dai nagpakaligtas asin sa katapusan nagkapiriritan na magburutas sa
