bis pa sa nitro-glicerina! Mga lúhang tiniripon; hinigpis na mga kaongisan, mga gibong salá sa katanosan asin mga katampalsanan! Iyo an húring pangatanosan kan maluya, kosog sa kosog, rigon sa rigon. . . nataodtaod pa sana nagduduwaduwa ako, alagad napadigdi ka asin nadara mo ako! Ngunyan na banggi marulupad na mga polbos an mga mababangis na orog na mga mapangánib, an mga mababangis na mga iresponsable, su mga nagtatagó sa likod nin Dios asin kan Estado, asin an mga kapalabilabihan nagdadanay na dai naaano huli ta dai sinda nin mangyaring makapag-túyaw! Ngunyan na banggi madadangog kan Filipinas an potok, na mabalaw sa rogmok an makanos na bantayog na an pagkalapá sakúyang hinumari!”
Namomongnan si Basilio: naghihiró su saíyang ngábil, alágad dai man nakakapaluwas nin daging, namamaté nyang dai nakakahiro su saiyang dila, nagmamara su saiyang ngaradngad. Iyo pa sana ito an pakahiling nya kan mapangyaring liquido na dayaday nyang madangog na pinagsasabi, bilang pinagpatagdong luhay-luhay sa kadikloman nin mga tawong malipungaw, sa hayag na labanan tumang sa gabungan. Ngunyan nasa saiyang atubang, anilag asin madaragdarag, maingat na gayong ipinagpapalis sa laog kan masining na granada. Sa saiyang paghona si Simoun iyo su genio su Sangribo may sarong banggi na minahalé sa irarom kan dagat; nagdadakilang magdakúla, nasosokdo an langit kan salyang payo, pinapapotok su harong asin tinatanyog su bilog na lungsod nin sarong hiro kan saiyang likod. Su granada nagdakulang magdakula na garo nang korokinaban (405), asin su gaak baga nagngingirit na gagamban na pinagluluwasan nin mga baga asin mga laad. Iyo pa sana ito an pangyari na dinaog kan tákot si Basilio lubos na gayong nawara su saiyang malípot na dugó.
Alintaná, si Simoun tinotornilyohan nin higot an sarong napapalaén asin makakalilibong na kasangkapan, ibinobugtak su tubong cristal, su bomba, asin sa ibabaw kan gabos sarong mayrayrahayon na pantalla. Dangan hominarayo sa pagmasid kun anong mangyari, iyan nang inapling su payo sa sarong lado, iyan nang sa saró tanganing mapaghilinghíling nyang marhay an kamugtakan asin kagayonan kaito.
Asin kan makita nya na pinaghihiling sya ni Basilio
