“Si Makaraig?”
Si Capitan Toringoy nagaabo asin pinaghihiling si Isagani.
Kominirikiri si Chichoy na naghohoyomhóyom.
“Su joyerong si Simoun!”
"Si Simoun! ! !”
Sarong daing girirongan, na nahaman kan panggigilantas, sominonod sa mga katagang iniho. Si Simoun, an maitom na espíritu kan Capitán General, an mayamanon na parakarákal na sa saiyang harong nagduduruman sa pagbakal nin mga gapong butás, si Simoun na kaniguan an kapinohan na minaresibi sa mga binibíning de Orenda asin minasabi sainda nin mga pinong pataratara! Nin huli ta garong dai mapanubdan, tinubod. Credo quía absurdum (421), sabi ni San Agustin.
“Alágad si Simoun bakong dai dumán kasubanggi sa fiesta?” an hapot ni Sensia.
“Ohó,” an sabi ni Momoy, “alágad ngunyan naromdoman ko! Binayaan su harong kan mamamanggi na kami. Hominalé ta makoa kan pásib sa pagkasal.”
“Alágad bakong katoód kan General? bakóng kabakas ni Don Timoteo?”
“Ohó, bominakas tangáning mahimo nya su saiyang homot asin garadanon su gabós na mga kastilá.”
“Talaga!” an sabi ni Sensia; “ngunyan náhiling ko na!”
“Arin?”
“Habó nindong paniwalaan si tía Tentay. Si Simoun iyo an diablo na bominakal kan mga kalag gabós na mga kastilá... pinagparasabi iyan ni tia Tentay!”
Nangurus si Capitánang Lóleng, ribaraw na hominiling sa mga gapó natatákot na makita an mga ito na binaráliw sa mga baga; hinogkot ni Capitan Toringoy su singsing na halé ki Simoun.
“Nawará si Simoun na daing náwalat na girá,” an sabi pa ni Chichoy; “pighahánap sya kan Guardia Civil."
“Ohó!” an sabi ni Sensia; “hanapon ninda an demonio!”
Asin nangurus. Ngunyan dakol na mga bágay an isinasaysay, an dakulaon na gáyong kayamanan ni Si-
