su saiyang lawog, uminapling uli asin naghimaté.
Ibinareta ni Simoun su saiyang masakit na salaysay, kun paano na, may mga kagtolo nang taon an nakaagi, paghalé nya sa Europa, pano nin mga pagsarig asin mga masanggayang mga alisngaw nin payo, asin napadigdi ta mapakasal sa sarong daraga na saiyang minamahal, handang gumibo nin marahay asin magpatawad, bastang pabayaan syang mabuhay sa katiwasayan. Bakong siring kaini. Sarong makagigiram na kamot an tominoldang saiya sa arimborong nin sarong kariribukan na iinasusang kan saiyang mga kaiwal; pagngaran, kapaladan, pagmahal, ngapit sa panahon, pakahiwas, gabos nawara saiya asin nakadulag na sana sa kagadanan, salamat sa kabayanihan nin sarong katood. Sa bagay na siring, nanumpang manghihimalos sya. Dara su kayamanan kan saiyang angkos, na nalolobong sa kadlagan, dominulag, dominakit sa dapleng daga asin ipinanongod su saiyang sadiri sa ngaran na pangarakal. Ominayon sa digmaan sa Cuba, sa pagtabang sa partidong ini o sa partidong ito asin ta sa giraray nagkakamit nin pakinabang. Duman nya namidbidan su General comandante kan panahon na ito, na naholog saiya an boot, énot sa pamamatahaw nin pangenot na kuwarta asin dangan naging saiyang kaugay nin boot salamat sa mga crimen na nakakaptan kan joyero an tagong-hilom. Huli sa kuwarta ikinaabot nya nin katongdan asin kan digdi na sa Filipinas, ginamit nyang bilang butang kasangkapan asin iinosol nyang makaginibo kan gabos na mga sala sa katanosan na salyang inurawa an dai sa pagkabolong na kangaroan nya nin bulawan.
Halawig asin mapawot su kumpisal, alagad sa laog kaito dai na naolit na magtao nin tanda nin pagkatakot su confesor asin nagkapira sana lamang saligbaton su naghehélang. Banggi na kan si Padre Florentino, pakapamahid kan gan-ot sa angog, bominuhat asin naghorophorop. Naghahadé kaito sa lalamban an sarong dai masayod na kadikloman, na pinapano nin liwanag kan mga siring kan tala-sinag na minalaog sa bintana may kaibang maalopoop na anilag.
Sa tahaw nin dai pagkinaalohan, su tingog kan padi dominaging na mamondo, piyanpiyan, alagad makayoyogto:
“Papatawadon ka nin Mahal na Dios, Ginoong. . . Si-
