asin pinagngingirisihan ako. Tangáning mabolong an karatan na ito na pinagsasabi ko saimo, boot kong tokdoán nin kastilá su mga akí huli ta laen pang ipinagboot kan Pamahalaan, pinaghoná kong saró (1) man na kapakinabangán kan kagabsan. Ginámit ko an orog kamasipag (228) na palakaw, mga katagá nin tataramon asin mga pagngaran (229), dai ako naggamit nin mga darakúlang pagsusundán, pinaghalat kong mapagtokdoán sinda nin Gramática kun makasábot na sinda kan tataramon (230). Pagkaáyaw nin nagkapirang semana su mga mataleon na gayo haros nagpakasabot na sakuyá asin nagtotorogdas na nin mga katagá nin tataramon."
Ominórong su maestro asin garong nagborongborong; dangan, garo baga sa igwa na syang pinagmarhay, nagpadagos: "Dai ko súkat ikasópog an salaysay kan mga paglapastangan sakuyá; siisay man sa sakong kamugtakan, síring an gigibohon. Síring sa sinabi ko na, marahay su pagkápoon; alágad pakalihis nin nagkapirang aldaw, ipinaapod ako ni Padre Dámaso, na iyo su cura kaito, sa sacristán mayor. Nin huli ta talastas ko su saíyang ugalé, natákot akong papaghalatón sya, sominakat ako tolos, nagtao ako nin gálang saiya asin nagmarhay-na aldaw ako sa tataramon na kastilá. Sya, na sa lambang pagtatao ko nin gálang, iginagawágaw sakó an saíyang kamot tanganí kong hadokán, alágad ngunyan ihinaharayó asin dai ako pinapasalamatan, kundí ominaarak-atak na baga ako pinagtutuyá-tuyá. Nagkahilawhi-lawán ako; itoon sa kahampang su sacristán mayor. Dai ko tolos naaaraman kun anong sakong sasabihon; nagpadagos ako nin paghiling saiya, asin dai nagoontok nin kaaandak (231). Nawawaran na ako nin pakatíos, naghihilaga akong makaginibo nin dai maninigó, tara an pagkamarhay na cristiano asin an karapatan bakong mga bagay na nagsisinarongatan. Hahapoton ko na sya, kan panalé sanang ominórong sa saíyang pag arak-atak asin dagos akong pinaglanghadán: 'Buenos días palán, ha? !buenos días! !gracioso! tatao kang magkinastilá!' asin nagpadagos nin pagngisi." Dai napogolan ni Ibarra na mapáhoyom sya. "Nagngingisi ka," an sabi kan maestro na nagngingisi man; "ipinaháyag ko nang kan mga horas na ito dai
