“Nagdalan kami sa hilingon. Midbid mo na an samong mga artista, si Ratia, si Carvajal asin si Fernandez; kami lamang an mga nakasayod kan kabansayan kan saindang mga hirohiro, tara dai lamang kaito nagaralamaaan minsan kadikit su mga daing-pakanood. Si Chananay asin si Balbino, mga marhay minsan ngani mga paraaspaas; si Balbino nasala nin kadikit, alagad sa kabilogan marhay su luwas. Namuyahan na marhay kan mga indio, orog na kan gobernadorcillo, su komedyang tagalog; pinaghorohapros kaini su saiyang mga kamot asin nagsabi samuya na kanogon pa na dai pinalabanan sa princesa su gigante na buminihag saiya, bagay na sa saiyang ganan maluwas na makangangalas na gayo, orog nang gayo kun su gigante dai pagdoltan nin hamo kundi sa pusod lamang siring ki Ferragiis na ipinagoosip sa Historia kan Doce Pares. An Kagalanggdalang na gayong si Padre Fray Damaso, sa mabansayon na puso na nakakapalaen saiya, siring man an ganan kan gobernadorcillo asin nagsabi pa na sa siring na bagay, hihinguahon kan princesa na matuklasan su pusod kan gigante asin mapatamaan niya kan panapus na tusok.
“Dai kaipuhan na sabihon ko saimo na kan mga horas na pinagpapaluwas su hilingon dai itinogot kan mabansay na boot kan Rothschild na filipino; sorbete; limonada, refresco, dulce, arak etc., etc., na nangagsawa sa samuyang mga duduman. Nahidaw na gayo asin may dahelan su pagkadai duman kan midbid asin may inadalan na hagbayon na si Don Juan Criséstomo Ibarra na siring sa naaraman, iyong mamayo noodma sa bendicion kan gapong-tugmadan kan daktilang eskuwelahan na huli sa pagmahal nya sa mga namamanwaan saiyang pinagpapatindog. An karapatdapat na ining gikan sa mga Pelayos asin sa mga Elcanos (ta siring sa naaraman ko saro kan saiyang mga ginikanan sa ama taga duman sa mga bayanihon asin mga matutubis na mga lalawigan sa Amihanan, sakalé, saro sa mga énot na pagiriba ni Magallanes o ni Legaspi) siring man dai nagsipot sa bilog na maghapon huli sa kadikit na kamatean. Nakalakop sa lambang ngoso su saiyang pangaran asin hinihilwas sana huli sa kaomawan na daing ibang sasampotan kundi an kaomawan kan España asin kan tunay na mga kastila na siring satuya, na dai ta sagkod hinihimutikan an sato minsan pa
