Dámaso."
"Tara, pakatapus kan sermón, ipinaapod asin hinapot kun ngatá ta luminuwas" 'Dai ako nakasábot kan tagálog, Padre,' an simbag. 'Asin anó ta naglanghad ka na sabi mo griego ito?' kinurahawan sya ni Padre Dámaso na kanayon sya tinampá. Bominalós su hagbayon. Nagsontokan su duwa sagkod na pinagbulag."
"Kun nangyari iyán sakuyá..., an ngorobngorob nin sarong estudiante.
"Dai ako oyon kan gawé kan franciscano," an simbag kan saró, "tara an Religión dai súkat ipagbugtak na bílang padusa o bílang sílot sa kiisay man; alágad haros sakúyang ipinagrokyaw, midbid ko an hagbayon na ini, áram ko na taga San Pedro Makati, asin marhay magtaram nin tagalog. Ngunyan muya nya na ibílang sya sa sarong bagong datong halé sa Rusia asin nagkakaigwa nin dangog sa pagsagin dai tatao kan horon kan saíyang mga magúrang."
"Kun síring, linalang sinda nin Dios asin nagbabarakbakan sinda!"
"Alágad dápat kitang sumuwal sa pangyari," an pahayag nin saró pang estudiante; "an dai pagkaalo garo mansanang pagóyon asin su nangyari mahihímong maolit sa kiisay man satuyá. !Mábalik kita sa panahón ni Nerón!"
"Nalilibang ka!" igwang sarong sominimbag saiya; "Si Nerón sarong dakúlang artista asin si Padre Dámaso sarong bolok na marhay na predicador!"
Laen man su mga sarabisabi kan mga may pagkatawo na.
Alintanang naghaharalat kan pagdatong kan Capitán General sa sarong sadit na harong sa luwas kan banwaan, su gobernadorcillo nagsabi:
"An pagsabing kun siisay an igwa asin kun siísay an daing pangatanosan, bakong bagay na magían; alágad kun si Ginóong Ibarra magpakaingat lámang..."
"Kun nagkaigwa lámang si Padre Dámaso nin kabangá kan pagingat ni Ginóong Ibarra, alonggating iyo mong boot sabihon?" an saligbaton ni Don Filipo. "An karatan iyo ta nagkariríbay su mga papel; su hagbayon nagpahiling na síring sa sarong gurang asin su gurang síring sa sarong hagbayon."
"Asin sabi mo dai nin sarong hominiró, dai nin ominagap na pagbulagón sinda, maliban lámang sa akí ni
