“!Sabiha na igwa akong kamatean!” an pakimahérak kan daraga na nanggilantas; “papagtogtogon ako kan piano asin papaawiton!”
“Ipinagngak kan saimong ama, sosopogon mo an saimong ama?”
Tominindog si Maria Clara, hiniling su saiyang inaon, binorobiribid su magayon na takyag asin ngominorobngorob...
“Oho! kun igwa pa sana ako nin...”
Alagad dai tinapus su saiyang kataga nin tataramon
asin nananosan.
AN SAIYANG KAHALANGKAWAN
“!Boot kong makaolay an hagbayon na iyan!” an sabi kan saiyang Kahalangkawan sa sarong ayudante; “napukawan su bilog kong interés.”
“Pighanap na, sakuyang general! Alagad igwa digdi nin sarong bagong-tawo na hale sa Manila na nagpipirit na ipamidbid. Sinabihan niyamo na an Saimong Kahalangkawan mayo nin panahon asin ta dai napadigdi sa pakipagkita sa kiisay man kundi tanganing mahiling an banwaan asin sa pagtanaw sa procesion, alagad sominimbag na an Saimong Kahalangkawan sa giraray igwa nin panahon sa pagwaras kan magkakanigo ...”
Nagtakang ominatubang sa Alcalde su Saiyang Kahalangkawan.
“Kun ako dai nalilibang,” an simbag kaini, na dominoko-doko nin kadikit, “su hagbayon na ngunyan na aga nagkaribok kasi Padre Damaso dahelan kan sermon.
“Saro na naman? Nagholaw an fraile na iyan goboton an lalawigan o nagloloba na siya an nagboboot digdi? !Sabihi nindo an hagbayon na dumagos!”
Nininerbiyos su Saiyang Kahalangkawan na naglalakawlakaw sa magibong na sogod kan bidang.
Sa pagilaog igwa nin nagkapipirang kastila, na mga kasaralak kan mga militar asin mga may kapangyarihan sa banwaan nin San Diego asin kan sa mga pagta-
