sísing sakuyá, bakong sandag, kundi sarong pagkaúgay."
"Marhay, marhay!" an sabi kan Saíyang Kahalangkawan na tominúkaw asin itinokdó saiya su sarong tukawán, "pabayae akong magkaigwa nin kaalingan sa kadikit na horas; naoyonan kong marhay an saímong pangungugalé asin ipinokná na nyakó sa Pamahalaan kan Saiyang Kamahalan an dapit sa sarong condecoración huli kan saímong kaisipan na mamomoton sa banwaan na magpatindog nin sarong paadalan . . . Kun dominólok ka lámang sakuyá, namomongayahan kutá akong dumálaw sa upatyara (424) asin nalikayan gayod kutá an sarong masingpil na boot."
"An síring na kaisipan garong sa paghoná ko kaito saday na gayo," an simbag kan hagbayon, "dai ko pinaghohónang magkánigong gayo na ikalibang kan pangataman kan Saímong Kahalangkawan sa dakol mong pinangangataman; saró pa, an sakong katongdan iyo na an énot kong dolokon iyo an may orog kahalangkaw na kapangyarihan sa sakong lalawigan."
Tominangó-tangó su Saíyang Kahalangkawan tandang namomongayahan asin sa sarong tingog na baga dati nang pinagtotodan, nagpadagos:
"Mánongod sa pagkapasiplingan nindo kasi Padre Dámaso, dai ka magdara nin tákot, dai ka man magbalon nin maráot na boot: dai madodotdot minsán sarong búhok sa saímong payo, sagkod na ako pa an nagkakapot kan pamahalaan kaining Kaporoan; asin mapádapit sa excomunión, kakaolayon ko an Arzobispo, huli ta kinakaipuhan na sanayón ta sa mga pangyayari an satong sadiri, digdi dai ta mapapagngisihan an mga bágay na ini árog duman sa Peninsula (425) okun sa may inadalan na Europa. Minsán síring, sa mga másunod magpakaíngat ka nang gayo; hinampang mo nanggad su mga Corporaciones Religiosas na, huli sa saindang kahologan asin sa saindang kayamanan, nagkakaipong galangan. Alágad sosorogon ko ika ta muya ko an mga marhay na akí, muya ko na galangan an giromdom kan mga magúrang; namotan ko man su mga sakuyá asin !búhay an Dios! inda kun anong gibohon ko kun ako nasa kamugtakan mo..."
Asin sa panáleng pagliwat kan pinagoolayan, naghapot:
"Sinabihan ako na halé sa Europa; nagdumán ka
