taramon kan arcángel. Sarong makalolódok na tingog, malumbay, mapagmayó-mayó, nagtatangis su Ave María ni Gounod, tinogtogan kan piano na nangadyé sa saíyang kaibahan. Natonong su togtog sa procesión, ominontok su pangadyé asin ominódong si Padre Salvi. Su tingog nakakatao nin kayogtoan asin nakakapírit nin mga luhá: labis sa sarong pataratara an ipinahaháyag sarong pagngayóngayó, sarong hinanakit.
Nádangog ni Ibarra su tingog sa bintaná na saíyang namumugtakán, asin su kalipungawan hominilig sa saíyang pusó. Nasabotan nya kun guráno an pagtíos kan kalag na ito asin ipinapahayag sa áwit asin natákot syang maghapot kan dahelán kan sákit na ito. Monínong, baga may iniísip, kan madatngan sya kan Capitán General.
"Hampangan mo ako sa pagkaon: dumán satúyang pagolayan an mapádapit sa mga áking ito na nagpangharalé," an sabi saiya.
"Ako daw an dahelán?" an sabi sa malumbay na tingog kan hagbayon na hominiling, alágad dai nakita su Saíyang Kahalangkawan na baga dai syang pagmangno na nagsusunod kaito.
Anó ta pirintó su mga bintaná kan harong kan alférez? mga haen kan pagagi kan procesión, su lawog na sa lalaki asin su bádong franela kan Medusa o kan Musa kan Guardia Civil? Sakalé, nasayodan ni Doña Consolación an pagkamakaoóyam kan saíyang angog na nagkakabarandayán nin mga darakúlang ugat, na garong bakong agihán nin dugó kundí nin suká asin apdo, su mahibog na tabakó, ángay na samno kan saíyang mga malalátang ngábil, asin su saiyang maorihon na paghiling, asin, sa pagpahónod sa sarong maúgay na pasabong, dai nya boot ribarawón kan saiyang makatatákot na paghiling su kagayagayahan kan kadaklán?
!Ay! sa saíya an mga maúgay na pasanong nagkabudúhay kan Sagaban nin bulawan (10-a)! Mamondó su harong, ta maogma su banwaan, síring sa sabi ni Sínang; dai nin mga farol asin nin mga wagayway. Kun su bantay dai maglakawlákaw sa atu-
