Asin pinonan na pagpakolon nin luhaylúhay su mga daing solot na mga bitis kan rongaw, na mominalos su lawog huli sa kolog, na napiritan na ipanarag su saiyang mga kamot.
“!Aha! nagpoón ka na!” an sábing may kaibang sa tampalasan na kagayagayahan, asin paghalé sa paso lento dagos sa sarong allegro vivace.
Ominagrangay sa kolog itong makauúgay asin binuhat su bitís.
“!Kaipuhan na magsayaw ka, p — india!” an sabi kan Señora asin su latigo naglalabadlabad asin nagsasagiwisiw.
Lominokmó sa salog si Sisa na ibinugtak su duwang kamot sa duwang tabay asin hiniling nin mga matang botlog su nagpapasakit saiya. Duwang makosog na hugpa kan latigo sa talodtod an nakapabuhat saiya: bako nang agrangay, duwa nang ongal an lominuwas sa ngoso kan daing palad. Rinabsing su halos (21-a) na gubing, nabuksan su kilit asin bominolos su dugo.
Naasusang su tigre kan makita su dugo; su dugo kan saiyang victima an nakasadol ki Doña Consolacién
“!Sayaw, sayaw, condenada maldita! !Magraot pang mapahamak an Inang nagaki saimo!” an saiyang kurahaw; “!sayaw o gadanon ko ika sa latigo!”
Asin napopogol ito kan sarong kamot asin pinagpapakol kan saibong, pominoom nin paglokso asin nin pagsayaw.
Sa katapusan nasabotan man sya giraray kan rongaw asin nagkuyog na pighiro na bakong baragay su mga takyag. Sarong hoyom nin kamongayahan namantaag sa ngoso kan maestra, hoyom nin sarong Mefistofeles na babaye na nagkaigwa nin sarong dakilang adal; nagkaigwa nin kaongisan, pagbasangbasang, pagologolog asin kabangisan; alagad daing sindbing sarong harakhak.
Asin, nayiyingying sa gaya kan saíyang pinaghihiling, dai nakamangno kan pagdatong kan saiyang agom sagkod na nabuksan su pinto na tominanog huli sa sarong tumban.
Malungsí asin monínong na tominunga su alférez; nakita su nangyayari duman, asin hiniling nin makangingirhat su saiyang agom. Dai iniho naghiró sa saíyang namumugtakán asin hominoyom nin mapagtuyatuyang hoyom.
