tao nin escandalo sa mga marhay na cristiano? sarong kaaliwalasan na an ariponpon malaog nin lobo! Maninimbag ka kaini sa atúbang nin Dios asin kan mga may kapangyarihan!”
“Sa giráray maninimbag ako mga gawégawéng gumikan sa rogáring kong kabotan, Padre,” sumimbag si Don Filipo na dominokô-dokó nin lihay;“alágad an saday nyákong kapangyarihan dai minatógot na makiaram ako sa bágay mapádapit sa katinubdan. An mga boot makaiktad saiya, dai saiya makipagolay; dai nagpipírit sa kiisay man si Ginoóng Ibarra.”
“Alágad nagtataong bahígay sa pangánib, asin an namomoot sa pangánib, napapahámak diyan!”
“Dai akong nakikítang anó man na pangánib, Padre; su Señor Alcalde asin su Cápitan General, sakúyang mga poón, mga kaolayolay nya sa bilog na hapon, asin dai ako súkat magtao sainda nin ádal.”
“Kun dai mo sya palayason digdi, máhalé kami.”
“Ipagmomondó ko nin makurí, alagad dai ko mapapalayas an siisay man.”
Nagimasol su cura, alágad dai na nin bolong. Pinasabot su saíyang kairiba, na mapáwot su pagbuhat, asin magkasi luminuwás. Ominárog sainda su mga tawong dayupot nagpapasalimbad ki Ibarra nin kaongisan.
Nagorog su mga hiringhingan asin mga huringhuding; rinanihan asin pinataratara su haghayon nin nagkapira katawo asin nagsarabi:
“Nasa saimo kami; pabayae sana an mga iyan!”
“Saisay an mga iyán?” an may pagtaka nyang hapot.
"Su mga rominuluwas sa paglikay na maránihan mo!
“Sa paglikay na maranihan ko? na maranihan ko?”
“!Ohó! sabi excomulgado ka.”
Si Ibarra, sa pagtaka, dai nakaáram kun anong saíyang sasabihon asin nangalagkálag sa saíyang palibot. Nakita si Maria Clara na piglilipdan kan abanico su lawog.
“Alágad, mangyari daw?” an sabi sa katapusan; “na kita masa-Edad Media pa giráray? Diyatá...”
Asin pagkadólok sa mga daraga asin pakapagliwat nin tingog,
“Togote ako nindo,” an sabi; “nalingawán ko an sarong tagbúan; mabalik ako ta ibahán ko kamo.”
“Dai ka maghalé!” an sabi saiya ni Sinang; “masá-
