Espadaña su saíyang mga sukí, asin haros makilimós kan ikabubuhay sa aroaldaw. Kan panahón na ito naaraman nya sa sarong katóod nya, dayupot kan énot ki Doña Victorina, an makahahadit na kamugtakan kan ginang na iní, an saíyang pagkamakibanwaan asin an saiyang mabansay na boot. Nakakita dumán si Don Tiburcio nin katipak na lángit asin naghágad na ipamidbid sya.
Nagkita si Doña Victorina kasi Don Tiburcio. !Tarde venientibus ossa! sominabi gayod kutá kun tatao lámang nin latin! Sya bakó nang pasable, pasada na; saíyang mahibog na búhok náging saditsádit na pinotos, síring sa sabi kan saíyang sorogoón na babaye, síring kadakulá sa sarong pusong báwang; dinalaganan nin mga kakarotán su saíyang lawog asin nagpopoon nang maghiriló-hiló su saíyang mga ngipon; su mga mata nagkaigwa man nin kakundían, asin háyag na gayo; kaipuhan na paráting pagpakarhayón kun tihihíling sa harayó: su saíyang pangungugalé iyo sana an nátadá.
Pakalihis nin kabangang horas nin paghorónhoron, nagkasinabotan sinda asin naginakoan. Pagmamarhayón kutá nya an sarong kastilá na bakó na gáyong pilay, bakó na gáyong ramoramong magtaram, bakó na gáyong angás, bakó na gayong korós, dai nagtatágak an liwoy kun nagtataram asin madásig na gayo asin mahalagang bulanos síring sa parati nyang sinasabi; alágad an síring na mga kastilá dai lámang nagpakadólok saiya sa pagpahayag saiya kan ngaran na pagagom. Bakó sanang magkapira nya kádangog na "an bahígay ipinamumugtak na pangás" asin naniwalang bulanos na si Don Tiburcio iyo mansana an bahígay, tara huli sa saíyang mga madiklóm na mga banggi naángas syang ámay. Arin na babaye an bakong maálam (35-a) sa kagurangan na tolong poló may duwang taón?
Mapádapit man ki Don Tiburcio, nakamaté ini nin baga daing dahelan na kalipungawan kan isaísip an saindang luna de miel. Hominoyom kaiba an pagóyon sa itinátao kan kapaladan asin nag-arang na omagap saiya an ladawan kan kagotoman. Sagkod pa man dai nagkaigwa nin ambición, dai man nin pinaghorot; masípag su saíyang mga kamuyahan, mga sókol lámang an saíyang mga kaisipan; alágad su saíyang pusó, na saíyang mga kaisipan; alágad su saíyang pusó, na mabiní sagkod kaito, nangatorogan sa orog kalaen na
