iná."
Asin binasa su ikaapat na togon sa tingog na lálong maluhaylúhay asin bohod, sa pagakálang makakatao nin dakúlang solemnidad sa acto siring sa nakita niyang ginigibo nin kadaklán na mga fraile; dai pa sagkod nakádangog si Tia Isabel nin nagpredicar na sarong cuákero, kun iyo tinakigan man kutá.
Makapira daraha kan daraga su panyó sa saiyang mga mata asin su saiyang hinangos orog na gayong namamatean...
"Abaa kamarahayon na kalag!" an sa boot kan gurang; "siya na orog kamakinuyogkúyog asin mahoyó sa gabós! Nagkaigwa ako nin labis pang mga kasalan asin ta dai ako nakapagtangis nin tunay na pagtangis."
Asin pinonan su ikalimang togon kaiba an haraláwig na mga hinangós asin sarong kabohodan na dai nin kakundian kun magkakanigó, dara an dakúlang entusiasmo, na dai pati nádangog su baga napopoot na siniloksigok kan saiyang makoiná. Sa saró lámang na pagódong, pakatapus kan mga paghorophórop dapit sa katutuyuhán na pakagadan, namatean su siniloksigok kan babáyeng parakasalá. Dangan binasa su natatadá pa kan mga togon na ginibo niyang su saiyang tingog máging orog kamapangharé, asin kan makita niyang nagtatangis pa su saiyang makoiná.
"!Tumangis ka, aki, tumangis ka!" an sabi na dominolok sa higdaan; "sa pagtatangis mo nin makuri papatawadon ka tolos nin Dios. Magsolsol ka nin contrición na orog pa karahay sa atrición. Magtangis ka, aki ko, magtangis ka! dai mo áram kun gurogurano an sakong gayagaya na makita ko ikang nagtatangis! Magtombok ka man sa daghan, alágad bakong kosog na marhay, ta naghehélang pa ika."
Alágad, garo bagang an sakit tanganing magorog nangangaipo kan misterio asin kan soledad, si Maria Clara, kan makitang namangnohan sya, sa diit-diit tominonong nin kahahagayhay, pinahidan su saiyang mga mata daing anó man na tataramon, dai man minasimbag sa saiyang inaon.
Pinadagos ni Tia Isabel su saiyang pagbasa, alágad, nin huli ta ominontok su luhá kan saiyang pigbasahan, nawaran nin kaglatan, (48-a), pinirot asin pinahágab sya kan húring mga togon na nakarátak sa saiyang
