man na naghihimaté su lalaki, dangan minadagos paglakaw pasiring sa pinaghahalean kan harayong daging.
Sa katapusan, pakalagbas sa riboribong kapawotan na itinatao nin sarong langobong kadlagan, nakadatong sa sarong sadit na liwanag, na pinagparigos kan bulan na patalubo. Haralangkaw na mga bato, na napopotongan nin mga kahoy, an mga nasa palibot na minabilog nin sarong bilang baga gabang anfitteatro; mga baragong paralodon na mga kahoy, mga torotong na batang an mga nakakapano kaitong kahiwasan, na nagpapakasalbog sa mga haralangkaw na bato, na lakop nin mga marambongon na kahoy.
Pahangang dumatong itong tawo, kan an saro man na orang (50-a), na panaleng lominuwas sa likod nin sarong dakulang bato, omenenotan asin pakagabota su revolver.
“Siisay ka?” an hapot sa tagalog sa mapangyaring tingog, na kanayon kasaha su saiyang hamo.
“Anion sa saindong pagiriba an gurang na si Pablo” an hapot kan hinapot sa matoninong na tingog na dai sominimbag saiya asin dai man natikbahan.
“Su capitan an pigsasabi mo? Oho, anion.”
“Sabihi, kun siring, na digdi pinaghahanap sya ni Elias,” an sabi kan tawo na bakong iba kundi su misteriosong piloto.
“Ika si Elias?” an may kaibang kagalangan na hapot kaitong saro asin rominani na nadododoy man giraray su revolver; “ kun siring, madya.”
Nagsonod saiya si Elias.
Sominohot sinda sa garong lungib, na namumugtak sa kairaroman kan daga. Su kanoro (51-a), na nakakatalastas kan agihan, minasabi su piloto kun noarin sukat lomogsot, domoko o komamang; alagad, daing gayo nagkaharaloy, asin nagpakadatong sa sarong baga bidang, na naliliwanagan nin mga ilawan na salong, na namumugtakan nin kagduwa o kaglima katawo na may mga hamo, na mga maati su mga pandok asin mga malaboy su mga gubing, su iba nagtuturukaw, su iba naghihirigda, na mga pahanga nang mag-orolay. Nagngangaralindoonan sa sarong gapo na bilang baga sarong hapag, asin pinaghihiling na baga may pinagiisip, su ilaw na nagwawarak nin kakadikiton na liwanag sa siring kadakol na aso, nakikita an sarong gurang na mamondo su panglawog, su payo napoporo-
