mo kun anong ginibo? Dai? Nakaisi ka na ipinasagin an sarong paghabon sa convento, asin sa mga nasosombong kabilang su saró kan sakong mga aki? Su saró dai ikinaiba huli ta dai dumán. Nakaisi ka kan mga pasákit na pinaagihan sainda? Aram mo huli ta iyo an ginagamit sa gabós na mga banwaan! Ako, nakita ko su sakong aki na nabibitay asin ta sa búhok su gakod, nádangog ko su saiyang mga inagrángay, nádangog ko na nagaapod sakuyá, asin ako, matalaw asin tood sa katiwasayan, dai ako nagkaigwang dahás na gumadan o makagadan! Talastas mo na dai napatunayan su paghabon, na namantáag su pakararáot asin bilang padusa su cura idinákit sa sarong banwaan, asin su sakong aki nagadán huli kan mga pasákit? Su saró, su nátadá sakuya, bakong matálaw na siring kan saiyang amá, asin sa tákot kan verdugo na singilón saiya su pagkagadán kan túgang, sa pasaráhot na daing cédula huli ta saiyang nalingawan, binilanggó kan Guardia Civil, kinolog, pinadágit asin pinapagkainit huli sa mga paglanghad sagkod na napiritan na maghogot! !Asin ako, nabúhay ako pakatapus nin siring na kasopoganan, alágad kun dai ako nagkaigwa kan danás nin sarong amá sa pagsorog sa sakong mga aki, natatadaán ako nin sarong pusong ipanghihimalos asin manghihimalos ako! Su mga descontento nagtitiripon sa irárom kan sakong pagboot, an sakong langtad pinapadakulá kan sakong mga kaiwal, asin sa aldaw na ibilang kong makosog na ako, mataroron ako sa tanáyad asin paparaon ko sa kalayo an sakong panghimalos asin sa sakong rogáring na ada! Asin mádatong an aldaw na ini o dai nin Dios!"
Asin tominindog su magúrang sibot, asin naglaláad su mga mata asin malagong su tingog, suminabi pa na pinaghohorohaprós su saiyang haralábang búhok.
"Sumpá, sumpá sa sakó ta inolang ko su mapanghimalos na mga kamot kan sakúyang mga akí; ginadán ko sinda! Dápat ko kutang pinabayaan na magadán su may sala, daing gayo kutá ako nagtubod sa pagkasandag (52-a) nin Dios asin kan sa mga tawo, nasa sakuyá kutá su sakong mga akí, sakalé, mga dulag, alágad nasa sakuyá asin dai kutá nagkagaradán sa mga pasákit! Dai ako ipinangakí na máging amá, kayá dai sinda sakuyá! !Sumpá ta dai ako nakánood kan sakong kagurangan sa pakamidbid kan palíbot kan
