sakóng inóontokan kaito! Alágad sa kalayo asin
dugó, asin sa sakó mansanang kagadanan makakánood ako na ipanghimalos kamo!"
Su daing pálad na amá, sa rigon kan saiyang kasakitan, rinabsing su venda sa angog, na bominoloboga nin dugó.
"Ginagalangan ko an saímong kasakitan," an simbag ni Elías, "asin nasasabotan ko an saímong panghimalos; síring man ako saimo, alágad sa tákot kong makalúgad sa sarong dai nin salá, pinagmarhay kong lingawán an sakong mga kadalitaan."
"!Ika mangyayaring makalingaw huli ta akí ka pa asin huli ta dai ka nadaihán nin akí, dai ka nawaran nin húring pagsárig! Alágad ipinangangakó ko saimo na dai ko lulugadan an siisay man na dai nin salá. Nakikita mo an lúgad na ini? Tangáning dai ako makagadán nin sarong makahehérak na cuadrillero na nagotob kan saíyang katongdan, nagpabayá akong malugadan."
"Alágad hilingón mo," an sabi ni Elías pagkataodtaod na dai sinda nagkainalohan; "hilingón mo kun guráno kangirhat na gagamban (53-a) an bubugtakán mo kan mga daing pálad nyátong mga banwaan. Kun otobón mo an saímong panghimalos kan saimo mansanang kamot. Makangingirhat na balós an gigibohon kan saímong mga kaiwal, bakong laban saimo, bakong laban sa mga hamohan, kundí laban sa banwaan na iyong paráting isinosombong sunod sa kaugalean asin ta kun síring !guroguranong mga gíbong salá sa katanosan!"
"Magádal an banwaan nin pangalásag, ipaglaban nin lambang saró an saiyang sadiri!"
"Natatalastas mo na dai iyan mahihimo! Señor, namimidbid ko ika kan panahón na ika momongaya pa, kaito pinagtataohan mo ako nin mga mababansay na mga kahatolan; totogotan mo ako na...?”
Nanikmoroan su magúrang asin garong nangataman.
"Señor," an padagos ni Elías na sinókol na marhay su saíyang tataramon; "nagkapálad ako na makapaglingkod sa sarong hagbayon na mayaman, mabansay an pusó, dalísay asin nagmamahal kan karahayan kan banwaan. Sabi an bagong táwong iniho igwa nin mga katóod sa Madrid, inda, dai akong pakaisi, alágad ikakasabi ko saimo na kaúgay-nin-boot kan Capitán Gene-
