ral. Anong masasabi mo kun gibohon ta syang magdara kan mga sombong kan banwaan, kun gibohon tang magkaigwa sya nin paghalaga sa kapakanan kan mga daing pálad?"
Pominiringpiting su magúrang.
"Mayaman an sabi mo? Daing ibang sa ísip kan mga mayaman kundi an pagdúgang kan saindang kayamanan; binobuta sinda kan kaabhawan asin kan kabantogan, asin huli ta paráting mga marhay, orog na nganí kan igwa sinda nin mga mapangyáring mga katood, dai nin siisay man sainda na napupurísaw huli sa mga daing pálad. Aram ko an gabós ta mayaman ako kan panahon"
"Alágad an tawo na pinagsasabi ko saimo bakong síring kan iba; sarong akí na pinaglanghadán sa giromdom kan saiyang amá; sarong hagbayon na, huli ta dai pira magkakaiwa nin angkos, pinagisipísip an omaaboton, sarong marhay na omaaboton sa saíyang mga akí."
"Kun síring, sarong tawo na magiging mamongaya; an bágay nyató bakong sa mga tawong mamongaya.'
"Alágad sa mga tawong may pusó!"
"!Tibáad pa!" an simbag kan magúrang na kanayon tuminúkaw; "ipamugtak mo na omoyon na saíyang paaboton an satong tingog sa Capitán General, ipamugtak mo na makasompong sya sa Corte nin mga diputado na tumábang satuyá, naghohoná ka na gigibohon sató an matanos?"
"Baloón nyató bago kita gomibo nin sarong madugong palakaw," an simbag ni Elías. "Súkat mong ipagtaka na ako, saró man na daing pálad, aki pa asin masárig, magmokná saimo, magúrang asin maluya, nin mga matiwásay na palakaw; alágad nasaksihán ko an makúring mga pagtíos, na kita an mga náging dahelán siring man kan mga tirano: an maluya iyong nagbabayad."
'Asin kun dai kitang anó man na makamtan?"
"Igwa nin makakamtan, maniwalá ka sakó; bakong an gabós na nagpapalakaw kan pamahalaan anas mga sarongat sa katanosan. Asin kun dai kitang makamtan sa anó man, kun dai dangogón an satong mga tíngog, kun an tawo minaluwas na bongog sa mga kasakitan kan saiyang kapuwa, kun síring, magigi akong saímong parasúnod!"
