magpoon duman itinataltag kan Kapaladan sa mga
angkos mga ngisi o mga luha, mga karakanan o kagotoman.
Kan paglaog niyamo samuya nang nakita su Gobernadorcillo, si Capitan Pablo, si Capitan Basilio, si Lucas, su tawong may pinilaan sa pandok, na nagmdndo nin makuri huli kan pagkagadan kan saiyang tugang.
Domindolok si Capitan Basilio sa saré kan mga duduman asin naghapot:
“Tatao ka kun anong manok an dara ni Capitan Tiago?”
“Inda po, señor, ngunyan na aga inabtan siya nin duwa, saro kan mga ito su sarab na nakadaog kan talisayon kan Consul.”
“Paghona mo malabanan daw ito kan sakong bakongon?”
“ISa ganan ko sana! Ikakasi ko an sakong harong pati an sakong gibing!” Kan horas na ito nagdadangadang si Capitan Tiago. Su saiyang panggubingan, siring kan sa darakilang parabolang, bado na lienzo na Canton, pantalon na de lana asin kalo na jipijapa (63-a). May kasunod na duwang sorogoon. Daradara su sarab asin sarong dakulang manok na ogis.
“Sinabihan ako ni Sinang na nagrarahay na si Maria!” an sabi ni Capitan Basilio...
“Dai nang lagnat, alagad maluya pa.”
“Nadaog ka kasubanggi?”
“Kadikit, isi kong nanggana ka... hilingon ko tibaad makabawi ako.”
“Muya mong ibilang an sarab?” an hapot ni Capitan Basilio na hiniling su manok, na hinagad sa sorogoon.
“Kun igwa nin kasi.”
“Pira an ipoposta mo?”
“Kun kilang an duwa, dai ko ibolang.”
“Nakita mo su sakong bakongon?” an hapot ni Capitan Basilio asin inapod an saro katawo na may darang sadit na manok.
Pinaghilinghiling ito ni Capitan Tiago, asin pakagingina asin pakatapus na mapangiskis ito iinuli.
“Pira an saimong kasi?” an saiyang hapot.
“Su muya mo.”
“Duwa asin limang gatos?”
“Tolo?”
“Tolo!”
