duwa; nagbanggaan su duwang tuká, nagtinamaan su duwang daghan, naginigoán su duwang tambod asin nagsinabitan su duwang pakpak; mahúsay na kinalasagan an mga panglalaban na ito asin dai nin ibang nahólog kundi kadikit na balúkag. Nagbalik namán na
magsinokolán su duwa; daing ano-ano luminupad su ogis, ominitaas na pinagpapalabadlabad su tambod, alágad linokón kan pula su mga paa, idinokó su payo, asin daing ibang naigó su ogis kundí su angkas; alágad pagdoot sa dagá, sa paglikay na malúgad sa likod, panáleng bominalik asin tominalad. Angot na dominagosó su pula, alágad moninong na nangalásag: bakong sayang na mamuyahan kan katawohan. Su Pangánib kan labanan pinagsusunod kan kagabsan na tinatarakigan asin nagkakaharandal, na nagtataga-luwas sa dai man tinotúyong kagsing. Linalakpan na linalakpan su dagá nin
mga pula asin puting balúkag, na may mga digtang dugó; alágad an pagdinaogan sa labanan bakong sa énot na pagbolos nin dugó; muya kan mga filipino, sa pagsunod sa mga katogonan na mga itinao kan Pamahalaan, an magadán o an énot na dumulag iyo an daog. Su dagá nabaribí na nin dugó, soronod na su paspasan, alágad dai pa nasasáyod kun arin an mandadaog. Kahurihurihi sa pangatapusan na paghinguha, dominagosó su ogis tangáning ikatao an húring porok, isinaksak su bólang sa pakpak kan pula asin nakatósok sa pagoltanan kan mga tolang; kundí su ogis nalugadan sa daghan, asin natitían na nin dugó, maluluya, naghahalhal, nagtatakodan, magkasi daing hiróhiró sagkod na napukan su ogis, nagluwas nin dugó su tuká, nagkiraykisay asin naghingagdan; su pula, nagogootan sa pakpak, nagdánay sa katáid, nagluhaylúhay na lomokob asin inánay na ipiníyong su mga mata.
Dangan sunod sa ipinagboboot kan Pamahalaan, ipinaháyag kan sentenciador na iyong gana su pula; pinataratara su sentencia nin sarong makosog na kururáhaw, kururáhaw na dangog sa bílog na banwaan, haláwig, pantay asin nagdánay nin nagkapirang hidalé. Su mga nagpakadangog kaito sa harayó nakasáyod na iyong nanggana su dejado, ta kun dai bakó kutang haláwig su kaogmahan. Síring man an nangyayari sa mga bansá: sarong sadit na nakalúpig sa dakulá, inaawit asin ibinabaretá sa gabós na panahon.
"Nakita mo?" an may kabaldían na sabi ni Bruno sa
