saka? Dai mo nakikita an mga bitís na iyán? Anó pang
muya mo? Hilinga an mga páang iyán bukaha an pakpak! Asin an kiskis na ining baak sa ibabaw kaining
halakbang, asin ining doble?"
Dai sya nádangog ni Társilo, padagos na pinaghiling-híling su háyop: nakaabot sa saíyang pagdangog su kinaragkay kan bulawan asin pírak.
"Hilingón ta ngunyan an bakongon," an sabi sa baga nalalamós na tingog.
Kominumpag si Bruno, pinarágot su saíyang mga ngipon, alágad kinúyog su saíyang túgang.
Dominólok sinda sa saró namán na pangkat. Dumán pinagtatambodán su manok, nagpipirili nin mga bólang, naghahandá su paratambod nin pulang suklá, binugtakan nin taro asin nagkapira hagoda.
Pinatós ni Társilo su manok nin sarong paghiling nin dai marorop na kamondoan: garong dai nya nakikita su manok kundí itong bágay ngápit sa panahón. Hinaprós su ángog asin...
"Natatalaga ka?" hinapot su saíyang túgang sa malágong na tingog.
"Ako? kaito pa; dai kaipuhan na hilingón ko an mga ito!"
"Ta su... satong túgang na babaye..."
"Abaa! Dai ka sinabihan na si Don Crisóstomo an pamayo? dai mo sya nakítang naglakawlákaw kaibahan kan Capitán General? Anong pangánib an satong inaagihan?"
"Asin kun magadán kita?"
"Anó man kaiyán? Su satong amá nagadán sa hampak."
"!Tamá ka!"
Hinanap si Lucas kan magtúgang sa mga torotiripon. Tolos mansanang matanawan ninda, ominantoró si Társilo.
"Dai! mahalé kita digdi, madadaog kita!" an sabi. "Lakaw kun muya ka, inaakó ko!" "!Bruno!" Sa maráot na kapaladan, may dominólok na saró katawo asin nagsabi sainda:
"Maposta kamo? Sa bakongon ako."
Dai nagsimbag su magtúgang.
