Victorina nakataram man giráray.
"Ako mauri, asin ika an maurihan?" an may paglanghad na sabi kan Medusa; "ohó! nauuri ako saimo kan mga korokirikot na iyán!"
"!Madya, babaye!" an sabi kan doctor; "hare saiya pag...pagngarongato!"
!Pabayae na taohan ko nin ádal an talagang daing sópog na inihó!" an simbag kan babaye na kanayon itinoldang su saiyang agom, na kadikit pang maghadok sa dagá, asin pakaatubangá si Doña Consolación.
"Magmaan ka kun siisay an saimong kaólay!" an sabi; "dai ka sumiring na ako sarong taga lalawigan o sarong karáhay-nin-boot nin mga soldados! Sa sakong harong sa Manilá, an mga alférez dai nakakalaog, naghaharalat sa may tatá.'
"Hola, Halangkawon na Señora Puput! dai maralaog an mga alférez, alágad an mga biyadhing iyo siring baga kaiyán, !ha! ha! ha!"
Kun bakong su mga coloretes, nakita kutang namula si Doña Victorina: boot dasmagan su saiyang kaiwal, alágad pinógol sya kan bantay. Kan mga horas na ito nagdadakol na magdakol su mga osiyoso sa lansangan.
"Maghimaté ka, nadudustá akong makipagólay saimo, an mga orang (68-a), na may categoria... Muya kang maglaba kan sakúyang gúbing, tataohan ko ika nin marhay na báyad! Nagloloba ka daw na dai ako nakaisi na kaito saró kang lavandera!"
Angot na tominindog si Doña Consolación, nagninton sya kan mapádapit sa lavada.
"Naghohoná ka na dai ako nakakaisi kun siisay ka asin kun anong mga tawoha an saimong pigdadara? Sinabi na sakó kan sakong agom! Señora, ako nánongod sa saró sana, alágad ika! Kinakaipuhan magadan sa púnaw tanganing madara su mátadá, su rapo nin siisay man."
Nagkainit si Doña Victorina; nagngaloskós, ginogom su kamot asin pakapanggoop nagsabi.
"Lumusad ka, garong dustá, ta roromoson ko an maating ngimot na iyán! Sambay nin bilog na hokbo, puta magpoón sa pagkamondag!"
Biglang nawará su Medusa sa bintaná, nakita syang nagdadalagan palusad, na pigpapalabadlabad su látigo kan saiyang agom.
Sinasagdonan si Don Tiburcio, alágad naggomolan
