nahon kan saimong ama sa kosog na minapamidbid sa makoapo kan mga bascongado... su iba nagsasabing binadolan, su iba man minataram na itinoldang sana, an katotoohan iyo na su tawo nasa kaalangalangan, napukan pakalikad nin nagkapira nakatama su payo sa gapo. Toninong na binuhat ni Don Rafael su aking nalugadan asin dinara sa tribunal, Nagruluwas nin dugo su ngoso kan ex-artillero na dai na nakamangno nin pagkatawo, asin ta nagadan pakalihis nin nagkapirang minuto. Natural na gayong makilabot su Justicia, binilanggo su saimong ama asin nagpangburahat su gabéos an mga hilom na saksi. Nagoran nin mga pakararaot, isinombong siyang hereje (34); asin filibustero (35); an pagkaereje saén man na lugar sarong dakulang karaotan nin palad nangorog na ngani kan panahon na ito na an lalawigan igwa nin sarong alcalde na ipinagdodorodakula an saiyang devocion, na kaibahan an salyang mga sorogoon nangangadyé sa laog kan simbahan sa halangkaw na tingog kan rosario sakalé, tanggani madangog nin kagabsan asin mangasunod saiya sa pagpangadyé, alagad an pagkafilibustero lalong maraot ki sa pagkaerehe asin gumadan nin tolong kobrador nin buhis na mga tataong magbasa, magsurat asin maggibo nin paglaénlaen. Pinabayaan siya kan kagabsan; sinarakmit su saiyang mga papel asin mga libro. Isinombong siyang nagaboloy sa El Correo de Ultramar asin sa mga pahayagan sa Madrid, ta ipinadara ka sa Suiza alemana, ta nakoahan siya nin mga surat asin retrato nin sarong pading binitay asin inda kun mga ano pang dai ko nagkaararaman? Sa gabos may nakokoang mga sombong, sagkod sa paggamit nin camisa, tara gikan siya sa mga peninsulares (36). Kun iba lamang su saimong ama, nakaluwas gayod kuta tolos, tara, may sarong médico na pinamumugtak sa congestion su pagkagadan kaidtong daing palad na kobrador; alagad; pinahamak siya kan saiyang kayamanan, kan saiyang paniwala sa sandagan o justicia asin kan saiyang kaongnisan sa and man na bakong sosog sa katogonan asin bakong sandag o magkakanigo. Ako mansana, minsan ngani habo akong magapod sa ugay nin siisay man, makipagkita ako sa Capitan General, su sinondan kaining sa ngunyan; ipinamidbid ko saiya na dai mangyayaring maging filibustero an sarong minaampon sa kiisay man na kastila na daing sukat o
