rong pangkat na igwa nin kosog na daing sókol, tangáning igálang, asin kapangyarihan tangáning makapagboot."
"Iyán pó kun an Pamahalaan nakikilaban sa banwaan; alagad sa karahayan kan Pamahalaan, dai ta dápat ipaáram sa mga tawo na an saindang gibo laban sa may kapangyarihan. Alágad kun síring, kun pinagmamarhay ta an kosog sa marhay na dangog, súkat nyatong hilingón na marhay kun siisay satong pinagkakaogdan kan kosog na ining daing sókol, an kapangyarihan na iniho. An síring kadakúlang kosog sa kamot nin táwong daing pakasábot, paranó nin mga hawa (82-a), mga inadalan dapit sa mabansay na kaugalean, dai pa napapatunayan na marhay na dangog, sarong hamo sa kamot nin sarong rongaw sa táhaw nin táwong maluluya. Oyon ako asin muya kong maniwalá síring saimo na kaipuhan kan Pamahalaan an kosog na ini, na kaipuhan pilíon nya an saíyang kosog, na pilíon an mga lubós na gayong karapatdapat, asin mantang lálong pinagmamarhay nindang taohan sinda nin kapangyarihan kan banwaan, ipahiling lámang na tataong magtao kaiyán."
May kaibang hawa, gambira su pagtaram ni Elías; naglaláad su saíyang mga mata asin nagaaniningal su daging kan saíyang tingog. Sominonod an sarong haláwig na pagórong: sakayán na dai pinagsasagwanan, garong monínong na naghihiró sa ibabaw kan katubigan; nagbabanáag su talá-sínag sa sarong bughaw na lángit; may mga nagbabangraw na ilaw sa pangpang sa harayó.
"Asin anó pang saindang hinahágad?" an hapot ni Ibarra.
"Kabaklean sa mga padí," nagsimbag si Elías sa sarong daing pagsárig asin mamondong tingog; "an mga daing pálad na iniho nangaghahágad nin orog na pagsorog laban sa ..."
"Laban sa mga Ordenes Religiosas?"
"Laban pó sa mga nagpapasákit sainda."
"Lingaw na gayod an Filipinas kan saiyang pagkakaútang sa mga Ordenes na ini? sakalé, nalingawán na nya an dakúlang útang na boot sa mga hominawas sainda sa kamalean tangáning ipagkaogdan sainda an pagtubod, sa mga nagsorog sainda laban sa kabangisan kan mga may kapangyarihan sa Pamahalaan? !Uya
