iyán sa Dios o sa saiyang mga takyag. Pinasasalamatan taka liwat asin súkat ka ihatod."
"Elias, an saimong mga mapait na mga tataramon minataros sa sakong pusó asin pinapagboborongbórong man ako. Anong saimong sa boot? Dai ako nagádal sa táhaw kan banwaan, na sakalé dai ko pinagaaraman an mga kinakaipuhan; pinalipas ko an sakong pagkaaki sa colegio nin mga jesuita, nagdakulá ako sa Europa, nagadal ako sa libro asin daing iba akong nabasa kundi su mga nagkadarara kan mga tawo sa liwánag; su nagdánay sa táhaw nin kadiklomán, su dai sinabi kan mga manunúrat, dai ko pinagaramán. Minsan siring, namomoot ako siring man saimo sa satong banwaan, bakó sana ta katongdan nin siisay man sa tawo na kamot-an an bansá na pinagkakautangan niya kan saiyang pagkatawo asin sakalé pagkakautangan niya man kan saiyang húring ontokan, bakó sanang huli ta tinokdoán ako nin siring kan sakong amá, huli ta an sakong iná india, asin huli ta digdi nabubuhay an gabós na mga mabansay niyakong giromdom, laen pa, namomotan ko ta útang ko asin magiging utang ko saiya an sakong kamongayahan!"
"Asin huli ta útang ko saiya an sakong maráot na pálad," an sabi ni Elias sa hababang tingog.
"Ohó sakúyang katoód, talastas ko na nagtitios ka, dai kang pálad, asin ini an minagibo na makita mong madiklom an omaaboton asin nakakalásig, sa saimong pagisip; huli kaini pinagngambahan ko an paghimaté kan saimong mga hinanakit. Kun ikasaysay mo sakó su mga nangyari saimo kan énot, masasayodan ko an mga dahélan..."
"Iba an ginikanan kan sakong mga kapahamakan; kun naaraman ko lámang na magkakaigwa nin pakinábang, isasabi ko gabós, saimo, laen pa na dai ko iyang ginigibong katakataka, midbid na gayo nin kadaklán.
"Šakalé, mapapakarhay an sakong pagloba kun maaraman ko iyán; aram mo na kanigúan an dai ko pagtiwala sa mga teoria, lálong ginigibo kong kanoró an mga pangyayari."
Namongnan si Elias sa laog nin nagkapirang hidalé.
"Kun iyo ini, señor," an saiyang simbag; "inoósip ko saimo sa gabós na tataramon an sakong kasaysayan."
