Idinoko ni Ibarra su saiyang payo.
"Dominolag su hagbayon siring sa sarong isinumpá," an padagos ni Elias; "dominolag sa manbinorobanwaan, sa mga kabukiran asin sa mga kapatagan, asin kan nagloloba nang dai na saiya nin makakamidbid, lominaog sa paglingkod sa harong nin sarong mayaman sa Tayabas. Huli kan saiyang pagkamasilansikan, kahamisan kan saiyang ugalé nakamtan niya an paghalaga kan gabós na dai nakakaisi kan saiyang agiagi. Sa kosog nin pagtotoklós asin pagtitikis, nakatipon sya nin kadikit na pohonan, asin mantang nakalihis na su pagtios asin aki pa, nagisip syang maging mamongayá. Su mabansay nyang tindog, su saiyang pagkaaki asin su magoroginhawa nyang kamugtakan, nakabihag kan pagkamoot nin sarong daraga sa banwaan, na dai nya pinangahasan na presentarán, sa tákot na matuklasan su saiyang nakalipas na panahón. Alágod makapangyarihan na gayo an pagkamoot asin magkasi su duwa nagkúlang su saindang katongdan. Su lalaki tanganing ikaligtas su dangog kan babaye, gabós ibinugtak sa panganib, hinágad nyang ipaagom saiya su babaye, hinánap su mga papeles asin natuklasan su gabós; mayaman su amá kan daraga, nahimo nyang hokoman su tawo, na dai nagpainda, gabós saiyang inakó asin ipinadara sa bilanggoan. Su daraga nangaki nin sarong omboy na lalaki asin sarong omboy na babaye, na pinagpadarakulá sa hilom, asin pinagpaturobod na gadán na su saindang amá, bagay na bakong mapáwot, huli ta nakita ninda kan sinda saraday pa na nagadán su saindang iná, asin pasipara lámang su saindang pagsiyásat kan saindang mga ginikanan. Nin huli ta mayaman su samong ápong lalaki, maogmang marhay su samong pagkaaki, saró kami sa pagádal saka su sakúyang túgang na babaye, nagminahalan kaming duwa siring sa pagmahalan nin duwang magkambal na mga dai nagpapakamidbid nin ibang mga pagmahal. Aki pa akong marhay kan magpoón ako nin pagádal sa colegio nin mga Jesuita, asin su sakong túgang, tanganing dai nanggad kami magkabulag, lominaog man na magádal sa La Concordia. Kan matapus su halipot niyamong pagádal, huli ta dai kaming ibang minamawot kundi maging mga paratánom, nagpuli kami sa banwaan tanganing bomátay kami sa pamana kan samong apó. Sa laog nin halipot na panahón nabuhay kaming mga
