AN BARAJA KAN MGA GADAN ASIN
Nalilipodán su bulan kan madampog na lángit; sarong malípot na doros, tandá na nagdadangádang su Diciembre, ipinaparálid an nagkapirang aralang na dahon asin su alpog sa hayakpit na dalan, pasíring sa cementerio.
Tolong anino nag-oorólay sa hababang tíngog sa tangod kan tatá.
"Kinaólay mo si Elías?" an hapot nin sarong tíngog.
"Daí, áram mo na pangbihírang marhay asin bakong matináram, alágad dápat syang masa-bílang nyató: ilinigtas ni Don Crisostomo an saiyang búhay."
"Huli nganí kaiyán ominakó," an sabi kan énot na tíngog; "ginibo ni Don Crisostomo na bolongon su sakong agom sa harong nin sarong médico sa Manila! Pinamahalaan ko su convento tangáning mahúsay su bayadán ko sa cura."
"Asin kami, sa cuartel sa pagsabi sa mga civil na may áking lalaki su samong amá."
"Pira kamo?"
"Lima, igó na an lima. Duwang poló-daa-kami sabi kan sorogoón ni Don Crisóstomo."
"Asin kun bakong marhay an saindong luwas?"
"Psit" an sabi nin saró asin su gabós dai nagkaraalo. Nakikita sa kadikit na liwanag na may nagdadangádang na sarong anino, sominalangi na sinósog su kodal; paráting minaantoró na garong minasalingoy.
Asin dai sya nagkúlang nin dahélan. Sa huri, may mga duwang pólong lákad, may nagdadangádang na saró pang anino, dakulá, asin garong laló pang anino ki kan sa énot: luhaylúhay na gayo su pagbátay sa dagá, nawawará syang panalé na garo baga hinahalon kan dagá sa lambang pagantoró asin pagsalingoy kan nasaenotan.
"May nagsusunod sakó!" an sabi kaini sa hababang tingog, "namá kun su Guardia Civil? nagpútik daw su sacristán mayor?"
"Sabi digdi an taragboan," olay sa hababang tingog kan ikaduwang anino; "garong may maraót na pinag-olayan kun iyán tinatagó sakuyá nin duwang magtúgang."
