Duman, iyan nang minaódong, iyán nang minalakaw sa dai midbid na mga dana minahorandig sa mga lawaan na kahoy, minasagrap sa mga marikot, minatanaw sa banwaan na sa harayó pinaparigos kan liwanag kan tala-sinag, minalatag sa katanayadan na baga naghihigdá sa pangpang kan dagat. Nangraralayawlayaw su mga gamgam na nagkagirimata sa saindang pagtorog; mga darakilang kulapnit, mga kuwaw, mga botbot, nagboborobaralyo sa mga sanga sa makangingilong mga ik-ik asin pinaghihiling sya nin mga matang bilogon. An mga ito dai nadadangog, dai man namamangnohan ni Elias. Naghohoná sya na pinaglalamag sya kan mga naaangot na mga anino kan saiyang mga ginikanan; nakikita nya sa lambang sanga su makangingirhat na alat na nalalaogán kan madugong payo ni Balat, siring sa isip saiya kan saiyang ama; sa poón nin lambang kahoy naghohona syang pinagsasagomok nya su gadan na gurang na babaye; garo nyang pighihiling na nagpopo-ay-poay sa kadikloman an lapang esqueleto kan makaoongis na apó... asin kinurahawan sya (110-a) kan esqueleto asin kan gurang na babaye nin: “Imatalaw, matalaw!”
Hominalé si Elias sa bolod, dominolag asin tominaroron pasiring sa dagat, ribaraw na naglilibot sa baybayon ; alagad duman sa harayó, sa tahaw kan katubigan, saén an liwanag tala-sinag garong naglalalang nin alopoop, sa pagloba nya nakakita sya nin nagbabangon asin nagtotorotabyon na sarong anino, su anino kan saiyang tugang na babaye na may dugo sa daghan, lugay su bihok, wagas sa angkas.
Napalohod si Elias sa baybay.
“!Ika man!” an sabi sa hababang tingog na hintiinat su magibong na takyag.
Alagad potitok su paghiling sa alopoop, luhayluhay na bominuhat asin dominalhog sa tubig na baga may pigsosonod. Naglalakaw duman sa anhay na logsoton; harayo na sya sa pangpang, paiksan na nya su tibig asin dagosdagos su lakaw, padagdos na baga binibihag nin sarong mapanglinlang na espiritu. Padaghan na nya su tibig... alagad dominaging an porokpotok nin mga badil... nawara su visién asin su hagbayon nagbalik sa katotoohan. Salamat sa kamoninongan nin banggi asin sa hibog kan angkas, minaabot saiya sayod asin hayag su porokpotok. Ominodong, nagiisipisip, naka-
