May itinao nang panganinohan; daing duwaduwa na nádangog an pagbukás asin pagpintong ito, luhaylúhay na binuksan asin maingat na ominotwal an payo nin sarong magúrang na babaye, kororos asin tiripó; sya mansana si Hermánang Puté na nakaparibok nin marhay kan nagsesermón si Padre Dámaso. An mga akí asin an mga gurang na babaye iyo an mga kinatawan kan makikiaramón sa ibábaw nin dagá: an mga énot sa pagmawot na makaáram, asin an mga ikaduwa sa paggiromdom kan mga iyán.
Daing duwaduwa na daing sumiminilas saiya, tara nagdánay dumán, tominanaw sa harayó na kinorondot su kíray, nanglimogmog, bominoga nin kosog, dangan nangurús. Maingat man na binuksan an sarong sadit na bintaná asin dominungaw si Hermánang Rufa, na habong manggayuma asin habó man na paggayumahon. Nagpahinilingan sa kadikit na hidalé, magkasi hominoyom, nagpasinabutan asin nangurus namán.
"!Jesús! garong misa de gracia, sarong castillo (113-a)!" an sabi ni Hermánang Rufa. "Magpoón kan gabaán ni Balat ining banwaan, dai ako nakakita nin bangging síring kaini," an simbag ni Hermánang Puté.
"Pira daw na putok! sabi su pangkat ni gurang Pablo."
"Mga tulisán? Daing mangyayaring iyo! Sabi su mga cuadrillero laban sa mga civil. Kayá nabilanggó si Don Filipo.
"!Sanctus Deus! sabi dai makúlang sa kagapat an gadán."
Irinánay na binuruksan su iba pang mga bintaná, asin ominorotwal an manibaibang mga lawog na nagpapatinaraonggalangan asin nagsasarabisabi. Sa liwanag kan talá-ínit, na may gilagílang masanggaya, nagkakataranaw sa harayó na sorosarábat su mga soldados, sorosaralbog, na garong mga abohón na mga anino.
"!Hoto may saró pang gadán!" an ólay nin saró maghalé sa sarong bintaná.
"Saró? Duwa an sakong nakikita."
"Asin ako... alágad sa katapusan sa dai ka tatao kun anó ito?" an hapot nin saró katawo na mapagtuyá-tuyá an panglawog.
"!Iyo! su mga cuadrillero."
