dagyang... aram mo nang ngunyan na hapon maharalé"
"An hagbayon na si Ibarra asin su teniente mayor...?"
Itinokdó kan alférez su bilanggoan.
"Walo an yaon dumán," an sabi "su Bruno nagadán matangá, alágad nasusúrat na su saiyang kapahayagan.
Nagtaong galang su Cura ki Doña Consolación, na ipinasalamat sarong hákay asin sarong !aah! asin tominukaw sa sillon sa tangod kan ladawan kan Saiyang Kamahalan.
"!Makakapoon na kita!" an saiyang simbag.
"Koaha nindo su duwa na mga nasa-pandog!" an pagboot kan alférez sa tingog na hininguha nyang orog kangirhat na gayo, asin inatubang su Cura, na suminabi pa na liniwat su tingog.
"Nasa-laog sinda nin duwang pinagtagbong mga labot!"
Sa mga daing pakatalastas kaining mga kagamitan na ini sa pagpadusa, sasabihon niyámó na an pandog iyo an saró sa mga garong dai makakaano. An mga labot na sinosorokan kan mga bitis kan mga nakokolong may lakwas na mga sandangaw, sa laog nin duwang labot, an bilanggó mamumugtak sa sarong kamugtakan na isinapirit lámang, mapagal sa banggoran asin mahohonathonat an saiyang mga paa nin labing sambara; dai tolos nakakagadan, siring sa mapapagakálá.
Sa tagapagbilanggó, kasunod an apat na bantay, hinogkot su bárat, asin binuksan su tatá. Sarong makasosomong párong asin sarong angkas na mahibog asin madalimasá nakaluwas sa makúring diklom kasabay na nadangog an mga inagrangay asin mga siloksigok. Sarong soldados nagsabrit nin fósforo, alágad su laád naparong sa bakong dalisay asin lapang itong huwa (116-a), asin nagkapiritan na maghalat sagkod na mabag-o su angkas.
Sa maromarom na liwanag nin sarong esperma may nababarang na mga tawó, mga lalaki na mga nakatangkoros sa saindang mga tohod asin natatagó sa mga ito su saindang mga payo, may mga dapá, may mga tindog, mga atubang sa parel, asin iba pa. Nádangog an sarong hakdol asin rágot, na may kaibang mga panumpá, binuka su pandog.
