sa atubang kan Virgen nin Turumba sa Pakil (59). Sayang gabos sagkod na sinadol siya ni Padre Damaso na dumuman sa Obando asin duman sumayaw sa fiesta ni San Pascual Bailon, asin humagad nin sarong aki.Talastas na sa Obando may tolong nagtatao nin mga aking lalaki asin mga aking babaye, asin ta makakapili an naghahagad: Nuestra Senora de Salambaw,Santa Clara asin San Pascual. Salamat sa pasunod na ini, namatean ni Doña Pia na pinagtotodkan sya... !ay! siring kaitong parasira na pinagsasabi ni Shakespeare sa saiyang drama na Macbeth, na tominonong nin pagkanta pakatuklas nin kayamanan, nadaihan nin kagayagayahan, naging mamondo, asin sagkod pa man dai na sya nakitang maghoyomhoyom. —!Paralaenon nya lamang iyan! an sabi kan kagabsan, pati si Capitan Tiago. Sarong calentura an ominatas kan saiyang mga kahoraan, asin nakapailo sa sarong magayon na omboy na babaye na binonyagan ni Fray Damaso mansana; asin nin huli ta dai nagtao si San Pascual nin aking lalaki na hinahagad saiya, nginaranan na Maria Clara sa paggalang sa Virgen nin Salambaw asin ki Santa Clara, sa paglilihing ini ki San Pascual, garo tabla pinadusahan an mahal na San Pascual Bailon. Nagdakula su aki sa pagmato kan saiyang inaon na si Doña Isabel, itong magurang na babaye na adal nin mga fraile na satong namidbid sa kapinonan. An dakulang kabtang kan taon eneérok nya sa San Diego dahel ta marhay an iklim (60) duman asin saén sya pinagkakaogdan ni Fray Damaso nin dakol na mga fiesta. An mga mata ni Maria Clara. bakong mga saradit na siring kan sa saiyang ina, kundi darakula na siring man kan sa saiyang ama, maitom, na nalilindongan nin mga ruyuwad na pirok, maogma asin samiraw kun nagkakawat, mamondo, hararom na baga igwang pinagiisip, kun dai naghohoyomhoyom. Kan saday pa sya,haros bulaw su saiyang buhok; su saiyang dongo dai nin kakundian sa kagiriran, bako man na mapanason,bako man na pingos; an saiyang ngoso nagpapagiromdom kan sadit asin marayrahay na ngoso kan saiyang mga marayrahay na mga bobonbobon sa pisngi; manipis siring kan énot na anib nin cebollas asin maputing siring sa bininyong gapas, kun sa tataramon
