mga pagsárig asin kan mga kapahamakan kan Kaporoan! Sa pangatorogan nakita ko ikang nagtitindog sa baybayon kan Manilá, tinatanaw mo an harayong sinokmol (77), na napapatós kan maromarom na liwánag nin pagkaágang ámay; nakakadangog ako kaito nin sarong malúhay asin malumbay na áwit, asin pinopúkaw sa giromdom nin sakong pusó su mga énot na taón nín sakong pagka-akí su satong mga kaogmahan, su satong mga kawat, su bilog na mamongáyang nakalipas na tinaohan mo ako nin kabuhayan kan ika itoon pa sa banwaan, sa sakong paghoná garo kang dalubhasá (78), espíritu, lamán kan sakong Banwaan, magayón, masipag (79), mamomoton, mabiní, ginahá kan Filipinas, kan magayón na ining Banwaan na minásaro sa mga darakulá, mababansay na mga gawé-gawé nin Inang España kan mga magagayon na kaugalean nin sarong langúbong banwaan, síring kan pagkatiripon sa bilog mong pagkatawo kan lubós na magayón asin madahom na nakakasamno sa magkasi-lahí; huli kaini an pagmahal ko saimo asin an sa sakong Banwaan nabibílog sa saró sanang . . . Mangyari daw na makalingaw ako saimo? Makapira ako paghoná na nadadangog ko an tanog kan saímong piano asin kan daging kan saímong tingog, asin sa giráray kun sa Alemania, an pagsinaklop kan kahaponon, (80) kun naglalakaw akong lagalag sa mga kadlagán, na tinawohan kan mga dai mapanubdan na mga kalalangan kan mga taga-pagrawitdawit dumán asin kan makagigilantas na mga orosipon kan saindang mga ipinangakí kan mga énot na panahón, ináapod ko an saímong pagngaran, inaakalá ko kaitong nahihiling taka sa nagbabangon na alopóop gikan sa kaoroiraromi kan kapatagan, sa sakong pagluba, nadadangog ko su saímong tingog sa rinagasnas kan mga dahon, asin, kun sa pagpulí kan mga taga-nayon haralé sa saindang pinagtutoklosan (81), magpadangog kan saindang pamamanwaan na áwit (82) garo namamaté kong sinasabayán kan tingog kan sakong pusó na nagaáwit saimo asin minapatunay kan alisngaw nin sakong isip asin kan sakong pangatorogan. Kun minsán, nalalagálag ako sa mga dalan-dalan sa kaboboldan, asin inaabot ako nin banggi, na dumán luhaylúhay na minádatong, nagrarapárap ako sa paghanap kan sakong agihán sa táhaw nin mga káhoy na pino hayas asin encinas; dangan, kun sa
