“Lakaw, solo nin duwang kandila na manuwang sikapat (91), saro ki Señor San Roque asin saro man ki Sr. San Rafael, pintakasi kan mga paraaldaw! Padokti su lampara kan Nuestra Señora de la Paz y Buenviaje, ta kaniguan na mga tulisan. Marhay pang maggasto nin apat (4) na sikapat (92) asin anom (6) na bilog (93) sa lana ki sa magbayad ngapit nin halangkaw na balukat.
Kabtang kan matawong nayon sa Manila an pinagdadalaganan kan lunadan ni Ibarra; itong nakatao saiya nin kamondoan kan bangging nakalipas, iyo man an nakasadol saiyang homoyom sa liwanag kan aldaw, laban sa saiyang boot.
Su kamungayahan na saen man minaburuswak, su mga lunadan na sarabatsabat su dalagan, su mga carromata, su mga calesa, su mga europeo, su mga intsik, su mga taga-duman, lambang saro sa saiyang rogaring na panggubingan, su mga babayeng mga parabalidya nin mga bungang-kahoy, su mga corredor, su hubang parabaktot, su mga alagad nin mga korukakanon, su mga pahingaloon na mga harong, su mga restaurant, su mga balidyaan (94), sagkod su mga carreton na pinaghoborotong nin mga pinagbabarodan nang damulag na garong nalilinga sa pagbotong alintanang nagaatid-atid, su gabos, su ribok, su pinarogpadog, sagkod su tala-init mansana, sarong laen man na parong, su manlaenlaen na kiray, minapikaw sa saiyang giromdom nin mga bagaybagay na baga nagkanaranok nang padagos.
Dai pa napapakarhay an mga lansangan na ito. Makosogon su init sa laog nin duwang aldaw asin ominalpog nin marhay, na iyong nakakatahob kan arin man na bagay, nakakapaabo asin nakakapalabog kan paghiling kan mga nagraralakaw: kun minaoran sarong aldaw, nagkakaigwa nin darakulang tamaw, na pagkabanggi nababanggrawan kan liwanag kan mga farol kan mga lunadan, na nakakatipsik sa rayong limang (5) metro sa mga nagraralakaw sa hayakpit na
