rong daraga na kaglimang taón an kagurangnan.
Siring sa sinabi na niyamó; si Padre Salvi maigot sa pagotob, alinsunod sa alférez, labilabi kamaigot. Alintanang nagsesermon - muyahon na marhay na magpapinipintoán su mga tatá kan simbahan; sa bágay na ini nakakaagid ki Nerón na daing tinotogótan lumuwas sagkod nag-aawit siya sa teatro; alágad ito minagibo nin siring sa karahayan kan mga kalag asin ini sa kapahamakan kan mga kalag. An gabós na pakalápas kan saiyang mga sákop parati niyang pinadudusahan nin mga multa, tara, bibihira siyang magbuhat nin kamot; digdi sa bágay na ini napapalaén man siyang marhay ki Padre Dámaso na an gabós hinohúsay sa mga sontok asin sa mga banóg na pinapaagi lámang sa ngisingisi asin sa orog kamabansay na boot. Nin huli kaini dai mahihimong pagbalonbalonan siya nin masingpil na pusó; naniniwala siya na daing ibang ángay sa indio kundi papaghagapusón; iyo ini an sabi nin sarong fraile na igwang sinúrat na sarong aklat, asin pinaniwalaan niya ito, tara dai niya pinagborongborongan su linimbag (138), kadákol na mga tawo an makakapaghinanakit sa siring na kahoyoan nin boot.
Bihirang magbuhat nin kamot si Padre Salvi, alágad, siring sa sabi nin sarong gurang na filósofo, an nagkukúlang sa kabilangan, nagsasawa sa kahalagahan, alágad minsán sa bagay na ini dai man giráray siya mapapagbalonbalonan nin masingpil na boot. Huli kan saiyang mga pagayuno asin mga paglehe luminuya su saiyang dugó luminuwas siyang nervioso asin siring sa sabi nin iba, minasohot an doros sa saiyang payo. Digdi minagikan kun anó ta dai namimidbid kan mga talodtod kan mga sacristan kun baga an sarong cura nagayuno nin marhay okun baga kominaon nin makuri.
Daing ibang kaiwal kan kalagnon na ining kapangyarihan na mináapling sa hawaknon na kabagsikan, siring sa sinabi na niyamo, su alferez. Daing iba, tara, an mga babaye nagsasabi na nagdudulag saiya an diablo, huli ta sarong aldaw, kan mangahás su demonio na lomukso saiya, nadakop niya, iginakot sa bitis kan catre, pinagparahampak kan cordon asin binuhian sana pagkaayaw nin siyam na aldaw.
Pagkalihis kan siring na pangyari, kun igwa pang mangahás, na mani kaiwal nin siring na tawo magkakaigwa nin dangog na orog pa karaót ki sa mga
