hon. Asin an siisay man na boot humimutik samuya, lumaog sa mga simbahan asin sa mga campo santo kan Kapuroan sa aldaw na ini, magmasid asin saiyang makikita. Asin mantang nasa-banwaan kita nin San Diego, dalawon nyato an cementerio kaini.
Dapit sa solnopan, sa tahaw nin mga kaomahan, itoon bakong an ciudad, kundi an barrio nin mga gadan: sarong hayakpit na dalan an pasiring duman na maalpog kun masaldang asin masasakayan kun mauran. Sarong tatá na kahoy asin kodal na kabanga gapo asin kabanga kawayan asin mga taldok, garong iyong minapasiblag kaito sa banwaan nin mga tawo, alagad dai sa mga kanding kan cura asin sa nagkapirang orig duman sa pagrarani na minaralaog asin minaruluwas sa pagsisiyasat sa mga linubngan okun sa pagtaong kaogmahan sa pagsaro-sarong ito huli kan saindang dagyang (150).
Sa tahaw kan mahiwas na itong kalikosan may sarong dakilang cruz na kahoy na natutugmad sa sarong patugmadan na gapod. Su INRI na lata natiplok nin barongbarong asin su mga letra nagkabaralnas nin oran. Sa poon kan cruz, siring sa tunay na Golgota, nagkakatarambak, sorosaralbog an mga bongo asin mga tulang na inorola kan daing-pakimanong paralobong sa mga hikay na saiyang hinahalean nin laog. Duman alongating naghaharalat bakong kan pagkabuhay liwat kan mga gadan, kundi kan pagdatong kan mga hayop, na huli kan saindang liwoy papainiton asin huhugasan an malipoton na itong pagkahuba.— Sa mga palibot nagkakakirita an mga bagong kotkot: digdi lon-ad an daga, duman minabilog nin sarong sadit na boroboklod. Marayrahay an tubo kan tarambulo (151) asin an pandakaki (152); an énot sa pagtodok sa mga tabay kan matonok na lawas kaiyan, an ikaduwa, sa pagdigang kan parong kaito sa campo santo, kun sakalé, kilang pa. Alagad su daga minagayon huli kan nagkakapirang saradit na mga burak, mga buirak na, siring kan mga bongo duman, iyo na sanang nakakamidbid an Kaglalang kan mga ito: malipungaw an hoyom kan mga birak na ito asin an alimyo siring kan sa mga linobngan: natatahoban kan mga awot asin mga nagkakaranap na mga tinanom su mga gilid, nagsoso- rosaralbid sa mga parel asin sa mga libongan na garo baga ginogubingan asin pinapagayon na kakanosan na
