AN ENOT SAKONG PASABONG
Anó ta nasarampúngay
alimyong daing kapantay,
an gabós na kaburakan
sa maogmang ining aldaw?
Sa kadlagan na pásig,
tadaw ta may rawitdawit,
na lubos ngáning kaagid
nin pakpakan bagang áwit?
Ngatá ta an hoyophóyop
nin doros pinapadangog
kan mga yamón an tíngog,
bulanos na makalódok?
Sa dai masábing ogma,
mga gamgam na gabós na,
nangrororoloksong sadya
sa lambang saró na sanga?
An burábod na anílag
nagririmorimong labat,
sa táhaw nin mga búrak,
masalinggaya an lákad?
Anó daw ta sa Sirangan,
magayón, panó nin lumbay,
daliwawa nagdudung-aw,
magayón, daing kapantay?
Ta kan tingog nya an gamgam,
símong aldaw rinorokyaw,
kan rosate na mabansay
alimyo simo iálay.
Asin an madalumbásay,
na burábod na malínaw,
an sabi simo: "!magdánay
mamongaya sa giráray!
Sa haginghing kan burábod,
dangga an áwit na énot,
sa kudyapi madadangog,
ádal sakong pagkamoòt.
