HURING PAARAM
Paáram, mutyang Banwaan, ronang payabá kan
Aldaw,
Mutyá nin Dágat Sirangan, nawara nyamong muraway.
Mamongáyang dólot símo an búhay kong malipungaw,
Kun masalinggaya kutá, langobó asin mabansay,
Sakuyá na idodólot kun símong ikakarahay.
Sa mga dagang labanan, sa mabangis na iríwal,
Mga daing pagalangán, búhay simo dinodúsay,
Máging ciprés, máging lirio, bitayán, bukás na húkay,
Mangirhat na kagadanan, mabangis na kasakitan,
Magkakaiyo mansana kun hihágad kan Banwaan.
Ginhawa ko mapapatod, sa lángit pagalagáag
Kan masalingáyang aldaw, katalingkasan tang halat,
Kun nagkaipo kang pula sa pagtugmá kan liwanag,
An dugó ko pabolosa, pabayae na lumanag,
Asin símong paningninga kan banggraw mong nagmomondag.
Mga pangatorogan ko kan akí pa akong sadang,
Kan saró nang barobatá, maginhawa, panong búhay,
Iyo na ika makíta, Perlas nin Dágat Sirangan,
Mamara an matang itom asin an ángog mabansay,
Bakong korot, bakong korós, máyong digtang kasopganan.
Pangatorogan nin búhay, sakong maláad na horot,
!Mabuhay! Olay kan kalag, madalé nang tumalikod;
Abaang ogmang mapukan tanganí kang makalayog;
Magadán na mabúhay ka, kan símong lángit sa tangog,
Asin sa saimong dagá sagkod lámang kumatórog!
Kun sa sakuyá na hukay makita mo sarong aldaw,
Sa mahibogon na dóot mahóyong búrak lumataw,
Ranihan sa símong ngábil, kan kalag ko ta hahadkan,
Mamatean ko sa ángog, sa malípot kong linubngan,
An malódok mong hinangos, an maínit mong pagmahal.
Pabayae na an Bulan somongkó sakong banáyad,
Togote an daliwawa omálay sakong banáag,
Pabay-eng magsiloksigok, doros tumangis na háyag,
Asin kun may sarong yamón na sa cruz nyakó lumupad,
Pabayae na iáwit katiwasayan na labat.
